റെഡ്ഡിയുടെ സംസ്‌കാരം വെള്ളിയാഴ്‌ച

ഹൈദരാബാദ്‌: വൈഎസ്‌ രാജശേഖര റെഡ്ഡിയുടെ മൃതദേഹം വ്യാഴാഴ്‌ച അഞ്ചുമണിയോടെ ഹൈദരാബാദിലേയ്‌ക്ക്‌ കൊണ്ടുവരുമെന്ന്‌ കെയര്‍ടെയ്‌കര്‍ മുഖ്യമന്ത്രി കെ.റോസയ്യ അറയിയിച്ചു.

വെള്ളിയാഴ്‌ചയാണ്‌ മൃതദേഹം സംസ്‌കരിക്കുക. ഹൈദരാബാദില്‍കൊണ്ടുവരുന്ന മൃതദേഹം വെള്ളിയാഴ്‌ച പത്തുമണിവരെ ലാല്‍ ബഹാദൂര്‍ സ്‌റ്റേഡിയത്തില്‍ പൊതുദര്‍ശനത്തിന്‌ വയ്‌ക്കും.

റെഡ്ഡിയുടെ മൃതദേഹം ഉച്ചയോടെ ചിറ്റൂര്‍ ആശുപത്രിയില്‍ എത്തിച്ചു. വ്യമസേനാംഗങ്ങളാണ്‌ റെഡ്ഡിയുടെയും അദ്ദേഹത്തിനൊപ്പം കൊല്ലപ്പെട്ട മറ്റു നാലുപേരുടെയും മൃതദേഹങ്ങള്‍ ചിറ്റൂര്‍ ആശുപത്രിയില്‍ എത്തിച്ചത്‌.

വെള്ളിയാഴ്‌ച കടപ്പയിലെ വസതിയിലെത്തിച്ചശേഷമായിരിക്കും റെഡ്ഡിയുടെ മൃതദേഹം സംസ്‌കരിക്കുകയെന്ന്‌ ചീഫ്‌ സെക്രട്ടറി അറിയിച്ചു.

റെഡ്ഡിയുടെ നിര്യാണത്തില്‍ മുഖ്യമന്ത്രി വി.എസ്.അച്യുതാനന്ദനും ആഭ്യന്തരമന്ത്രി കോടിയേരി ബാലകൃഷ്ണനും അനുശോചനം രേഖപ്പെടുത്തി.

പതിനൊന്നാം പദ്ധതിയുടെ രൂപരേഖ സംബന്ധിച്ച് തിരുവനന്തപുരത്ത് ദക്ഷിണേന്ത്യന്‍ മുഖ്യമന്ത്രിമാരുടെ സമ്മേളനം നടന്നപ്പോള്‍ റെഡ്ഡിയുമായി അടുത്തിടപഴകാനും വികസന കാര്യങ്ങളെ കുറിച്ച് ചര്‍ച്ച നടത്താനും കഴിഞ്ഞതായി മുഖ്യമന്ത്രി വി.എസ് അച്യുതാനന്ദന്‍ അനുസ്മരിച്ചു. അദ്ദേഹത്തിന്റെ മരണവാര്‍ത്ത നടുക്കമുണ്ടാക്കിയെന്നും വിഎസ് പറഞ്ഞു.

മാതൃകാ നേതാവായിരുന്നു രാജശേഖര റെഡ്ഡിയെന്ന് ആഭ്യന്തരമന്ത്രി കോടിയേരി ബാലകൃഷ്ണന്‍ അനുശോചന സന്ദേശത്തില്‍ പറഞ്ഞു.

സിപിഎം ജനറല്‍ സെക്രട്ടറി കാരാട്ട് മുതിര്‍ന്ന കോണ്‍ഗ്രസ് നേതാവ് കെ കരുണാകന്‍ തുടങ്ങിയവരും റെഡ്ഡിയുടെ മരണത്തില്‍ അനുശോചനം രേഖപ്പെടുത്തി.