ജസ്വന്തിന്റെ പുസ്‌തകത്തനുള്ള നിരോധനം പിന്‍വലിച്ചു

അഹമ്മദാബാദ്‌: പുറത്താക്കപ്പെട്ട ബിജെപി നേതാവ്‌ ജസ്വന്ത്‌ സിങിന്റെ പുസ്‌തകത്തിന്‌ ഏര്‍പ്പെടുത്തിയ വിലക്ക്‌ പിന്‍വലിക്കാന്‍ ഗുജറാത്ത്‌ സര്‍ക്കാറിന്‌ നിര്‍ദ്ദേശം.

മുഹമ്മദലി ജന്നയെക്കുറിച്ചെഴുതിയ ഇന്ത്യ-ജിന്ന, പാര്‍ട്ടീഷന്‍, ഇന്‍ഡിപ്പെന്‍ഡന്‍സ്‌ എന്ന പുസ്‌തകത്തിനേര്‍പ്പെടുത്തിയ നിരോധനം പിന്‍വലിക്കാനാണ്‌ ഗുജറാത്ത്‌ ഹൈക്കോടതി നിര്‍ദ്ദേശിച്ചിരിക്കുന്നത്‌.

സര്‍ദ്ദാര്‍ വല്ലഭായ്‌ പട്ടേലിനെ അപകീര്‍ത്തിപ്പെടുത്തുന്ന തരത്തിലുള്ള പരാമര്‍ശങ്ങള്‍ ഉണ്ടെന്ന്‌ കാണിച്ചായിരുന്നു ഗുജറാത്ത്‌ സര്‍ക്കാര്‍ സംസ്ഥാനത്ത്‌ പുസ്‌തകത്തിന്റെ പ്രസിദ്ധീകരണവും വില്‍പനയും നിരോധിച്ചത്‌.

ഈ പുസ്‌തകമെഴുതിയതിന്റെ പേരിലാണ്‌ ജസ്വന്തിനെ ബിജെപിയില്‍ നിന്നും പുറത്താക്കിയത്‌. ഇതിന്റെ അടുത്തദിവസം തന്നെ ഗുജറാത്തിലെ മോഡി സര്‍ക്കാര്‍ പുസ്‌തകം നിരോധിക്കുകയും ചെയ്‌തിരുന്നു.

പുസ്‌തകം നിരോധിക്കുന്നത്‌ ചിന്തയെ നിരോധിക്കുന്നതിന്‌ സമമാണെന്ന്‌ പരാതിപ്പെട്ട്‌ ജസ്വന്ത്‌ സുപ്രീം കോടതിയെ സമീപിച്ചിരുന്നു. ഇതേ ആവശ്യമുന്നയിച്ച്‌ ജസ്വന്തും പുസ്‌തകത്തിന്റെ പ്രസാദകരും ഗുജറാത്ത്‌ ഹൈക്കോടതിയിലും ഹര്‍ജി നല്‍കിയിരുന്നു.

പുസ്‌തകം നിരോധിക്കുന്നതിന്‌ മുമ്പ്‌ സര്‍ക്കാര്‍ ആദ്യം പുസ്‌തകം വായിക്കേണ്ടിയിരുന്നുവെന്നും നിരോധിക്കുമ്പോള്‍ അതിനുള്ള കാരണം വ്യക്തമാക്കേണ്ടിയിരുന്നുവെന്നും കോടതി ഉത്തരവില്‍ പറയുന്നു.