ഒറ്റ പ്രസവത്തില്‍ കണ്‍മണികള്‍ 5

മുംബൈ: ഇരുപത്തിനാലുകാരി ഒറ്റപ്രസവത്തില്‍ അഞ്ച്‌ ആണ്‍കുട്ടികള്‍ക്ക്‌ ജന്മം നല്‍കി. ഇന്ത്യയുടെ മെഡിക്കല്‍ ചരിത്രത്തില്‍ ഇതാദ്യമായാണ്‌ ഒറ്റപ്രസവത്തില്‍ അഞ്ച്‌ ആണ്‍കുട്ടികള്‍ ജനിക്കുന്നത്‌.

മുംബൈയിലെ മീരാ റോഡില്‍ താമസിക്കുന്ന സബീരാ ഖാന്‍ ആണ്‌ ആദ്യ പ്രസവത്തില്‍ അഞ്ചാണ്‍കുട്ടികളെ പ്രസവിച്ചത്‌. ആന്ധേരിയിലെ കോകിലാ ബെന്‍ ധീരുഭായ്‌ അംബാനി ആശുപത്രിയിലായിരുന്നു അപൂര്‍വ്വ പ്രസവം. അമ്മയും കുഞ്ഞുങ്ങളും സുഖമായിരിക്കുന്നുവെന്ന്‌ ആശുപത്രി വൃത്തങ്ങള്‍ അറിയിച്ചു.

മാസം തികയാതെയാണ്‌ സബീരയുടെ പ്രസവം. ഇത്‌ മുന്‍കൂട്ടി അറിഞ്ഞുകൊണ്ടുതന്നെ ഡോക്ടര്‍മാര്‍ എല്ലാമുന്നൊരുക്കങ്ങളും നടത്തിയിരുന്നു.

സാധാരണയായി മാസം തികയാതെ ഒന്നില്‍ കൂടുതല്‍ കുഞ്ഞുങ്ങള്‍ ജനിക്കുമ്പോള്‍ അവര്‍ക്ക്‌ എന്തെങ്കിലും കുഴപ്പമുണ്ടാകാറുണ്ടെന്നും ഒരു കുട്ടിയെങ്കിലും മരിച്ചുപോകാറുണ്ടെന്നും ഡോക്ടര്‍മാര്‍ പറയുന്നു. എന്നാല്‍ സബീരയുടെ കുട്ടികള്‍ക്ക്‌ പ്രകടമായ കുഴപ്പങ്ങളൊന്നും ഇല്ല.

രണ്ടുകുട്ടികള്‍ വെന്റിലേറ്ററിലാണ്‌. മറ്റുള്ളവര്‍ ഇന്റന്‍സീവ്‌ കെയര്‍ യൂണിറ്റിലാണ്‌. ആദ്യ പ്രസവത്തില്‍ അഞ്ചുകുട്ടികളെ ലഭിച്ചതില്‍ സന്തോഷമുണ്ടെന്ന്‌ സബീര പറഞ്ഞു. പക്ഷേ ഒരു പെണ്‍കുട്ടി ജനിക്കാത്തതിലുള്ള വിഷമം സബീര മറച്ചുവച്ചില്ല. വസ്‌ത്രവ്യാപാരിയായ ഉറേബാണ്‌ സബീരയുടെ ഭര്‍ത്താവ്‌.