തമിഴ്നാട്ടില് ഒറ്റയ്ക്കുമുന്നേറണം: രാഹുല്
ചെന്നൈ: തമിഴ്നാട്ടില് ഒറ്റയ്ക്കുമുന്നേറുകയാണ് കോണ്ഗ്രസിന്റെ ലക്ഷ്യമെന്ന് രാഹുല് ഗാന്ധി. അതേസമയം ഡിഎംകെയുമായി കോണ്ഗ്രസ് നല്ല ബന്ധമാണ് ആഗ്രഹിക്കുന്നതെന്നും അദ്ദേഹം പറഞ്ഞു.
ചലച്ചിത്രതാരങ്ങളായ രജനീകാന്ത് വിജയ് എന്നിവരെ അദ്ദേഹം പാര്ട്ടിയിലേയ്ക്ക് സ്വാഗതം ചെയ്തു. ചെന്നൈയില് വാര്ത്താസമ്മേളനത്തില് സംസാരിക്കുകയായിരുന്നു രാഹുല്.
യൂത്ത് കോണ്ഗ്രസിനെ ശക്തിപ്പെടുത്തുകയാണ് എന്റെ പ്രഥമലക്ഷ്യം. കോണ്ഗ്രസിലെ ഗ്രൂപ്പിസം എല്ലായിടത്തുമുണ്ട്. അത് തടയാന് ശ്രമിക്കും. ആന്ധ്രപ്രദേശ് മുഖ്യമന്ത്രിയെ പാര്ട്ടി തീരുമാനിക്കും. ഇതേക്കുറിച്ച് എനിക്ക് വ്യക്തിപരമായ അഭിപ്രായങ്ങളില്ല- രാഹുല് വ്യക്തമാക്കി.
മൂന്നു ദിവസമായി രാഹുല് തമിഴ്നാട്ടിലെ വിവിധ പ്രദേശങ്ങളില് സന്ദര്ശനം നടത്തുകയാണ്. ബുധനാഴ്ച വൈകീട്ട് 4.30ന് അഇദ്ദേഹം കോയമ്പത്തൂരിലെ ഗാന്ധിപുരം ജയില്മൈതാനത്ത് പൊതുയോഗത്തില് പ്രസംഗിക്കും.
സേലത്തുനിന്നും പ്രത്യേക വിമാനത്തിലാണ് അദ്ദേഹം കോയമ്പത്തൂരിലെത്തുക. പിന്നീട് പീളമേട് കാളപ്പള്ളി റോഡിലെ ഡോക്ടര് എന്ജിപി ആര്ട്സ് ആന്റ് സയന്സ് കോളെജ് ഓഡിറ്റോറിയത്തില് നടക്കുന്ന യൂത്ത് കോണ്ഗ്രസ് യോഗത്തില് പങ്കെടുക്കും.
ഇതിന് ശേഷം സൗത്ത് ഇന്ത്യ ടെക്സ്റ്റൈല് റിസര്ച്ച് അസോസിയേഷന് ഓഡിറ്റോറിയത്തില് യുവ വ്യവസായികളുമായി കൂടിക്കാഴ്ച നടത്തും. രാത്രി എട്ടുമണിയോടെ ദില്ലിയിലേയ്ക്ക് മടങ്ങും.