ഗുണ്ടാത്തലവന്‍ ആയിസജി പിടിയില്‍

കൂത്താട്ടുകുളം: ഇടുക്കി, കോട്ടയം ജില്ലകളിലായി ഒട്ടേറെ കേസുകളില്‍ പ്രതിയായ കുപ്രസിദ്ധ ഗുണ്ടാത്തലവന്‍ ആയി സജിയും കൂട്ടാളികളും പിടിയില്‍. രണ്ടാഴ്‌ചയായി സജിയെ പിടികൂടാന്‍ പൊലീസ്‌ ശ്രമം നടത്തിവരികയായിരുന്നു.

അരയ്ക്കു താഴെ തളര്‍ന്ന സജി പൊലീസിനെ വെട്ടിച്ചുകഴിയുകയായിരുന്നു. ആയി സജിയുടെ കൂട്ടാളികളായ വീരപ്പന്‍ ബിനോയ്, ധനീഷ് എന്നിവരെ തൊടുപുഴയിലെ ഒരു ലോഡ്ജില്‍ നിന്നുമാണ് പിടികൂടിയത്.

വ്യാഴാഴ്‌ച രാവിലെ പാലായ്‌ക്കു സമീപം കൊല്ലപ്പള്ളിയിലെ പമ്പില്‍ പെട്രോള്‍ നിറയ്‌ക്കാനെത്തിയ സജിയെ പമ്പ്‌ ജീവനക്കാര്‍ തിരിച്ചറിഞ്ഞു. ഇവര്‍ നല്‍കിയ വിവരമനുസരിച്ച്‌ വന്‍ പൊലീസ്‌ സംഘം സജി സഞ്ചരിച്ചിരുന്ന ഷെവര്‍ലെ കാര്‍ കേന്ദ്രീകരിച്ച്‌ അന്വേഷണം വ്യാപിപ്പിച്ചു. കൂട്ടാളികളായ രണ്ടു പേരെ ഉച്ചയോടെ തൊടുപുഴയ്‌ക്കു സമീപത്തു നിന്ന്‌ അറസ്റ്റ്‌ ചെയ്‌തതോടെയാണ്‌ സജിയെക്കുറിച്ചുള്ള സൂചന ലഭിച്ചത്‌.

തുടര്‍ന്നു സജിയുടെ കാര്‍ കണ്ടെത്തിയ പൊലീസ്‌ കൂത്താട്ടുകുളത്തിനു സമീപം പുതുവേലിയില്‍ വച്ചു പിടികൂടുകയായിരുന്നു. സജിക്കു പുറമേ കാറിലുണ്ടായിരുന്നവരില്‍ നിധിന്‍ എന്നയാളെ മാത്രമേ പൊലീസിനു പിടികൂടാന്‍ കഴിഞ്ഞുള്ളൂ. മറ്റുള്ളവര്‍ ഓടിരക്ഷപ്പെട്ടു. അരയ്‌ക്കു താഴേയ്‌ക്കു തളര്‍ന്ന സജിക്ക്‌ രക്ഷപെടാന്‍ കഴിഞ്ഞില്ല.

ഗൂണ്ടാ നിയമ പ്രകാരം നൂറിലധികം കേസുകളാണു സജിയുടെ പേരിലുള്ളത്‌. ഏതാനും വര്‍ഷങ്ങള്‍ക്ക്‌ മുന്‍പ്‌ കൊച്ചിയില്‍വച്ച്‌ പോലീസിന്‌ നേര്‍ക്ക്‌ വെടിവച്ചിട്ട്‌ കെട്ടിടത്തില്‍ നിന്ന്‌ ചാടി രക്ഷപ്പെടാന്‍ ശ്രമിയ്‌ക്കുന്നതിനിടെ വീണ്‌ പരിക്കേറ്റാണ്‌ സജിയുടെ അരയ്‌ക്കു താഴെ ചലനശേഷി നഷ്‌ടപ്പെട്ടത്‌. അന്നത്തെ കേസില്‍ ജയില്‍ ശിക്ഷകഴിഞ്ഞ്‌ പുറത്തിറങ്ങിയതിന്‌ ശേഷവും ഗുണ്ടാപ്രവര്‍ത്തനങ്ങള്‍ തുടരുകയായിരുന്നു. പ്രത്യേകം സജ്ജീകരിച്ച വാഹനങ്ങളിലായിരുന്നു സജിയുടെ സഞ്ചാരം.