അഴിമതിക്കാരുടെ വിചാരണ എളുപ്പത്തിലാക്കണം

ദില്ലി: അഴിമതിക്കാരായ പൊതുപ്രവര്‍ത്തകരെയും സര്‍ക്കാര്‍ ഉദ്യോഗസ്ഥരെയും വിചാരണ ചെയ്യുന്നതിന്‌ മുന്‍കൂര്‍ അനുമതി ആവശ്യമാണെന്ന വ്യവസ്ഥ എടുത്തുകളയണമെന്ന്‌ കേന്ദ്ര നിയമമന്ത്രി എം വീരപ്പമൊയ്‌ലി. ഈ വിധത്തില്‍ അഴിമതി വിരുദ്ധനിയമം ഭേദഗതി ചെയ്യണമെന്നും അദ്ദേഹം ആവശ്യപ്പെട്ടു. ദില്ലിയില്‍ ഒരു അഴിമതി വിരുദ്ധ സെമിനാറില്‍ സംസാരിക്കുകയായിരുന്നു അദ്ദേഹം.

പൊതുപ്രവര്‍ത്തകര്‍ ഉള്‍പ്പെട്ടിട്ടുള്ള ഭൂരിഭാഗം അഴിമതിക്കേസുകളും നിയമക്കുരുക്കുകളില്‍പ്പെട്ട്‌ വൈകുകയാണ്‌. ഇത്‌ മൂലം ഇത്തരക്കാര്‍ അധികാരസ്ഥാനങ്ങളില്‍ തുടരുകയാണ്‌. ഭരണഘടനയ്‌ക്കെതിരായ പൊതുജനവികാരവികാരമുണ്ടാകാനും നക്‌സല്‍ പൊലെയുള്ള പ്രസ്ഥാനങ്ങള്‍ ഉടലെടുക്കാനും ഇത്‌ കാരണമാകുന്നുണ്ടെന്ന്‌ അദ്ദേഹം ചൂണ്ടിക്കാട്ടി. ഇതിനാല്‍ ഈ വിഷയത്തില്‍ നിയമഭേദഗതി അനിവാര്യമാണ്‌.

ഇതേക്കുറിച്ച്‌ വിപുലമായ ചര്‍ച്ചകള്‍ ആവശ്യമാണെന്നും മന്ത്രി പറഞ്ഞു. പൊതുപ്രവര്‍ത്തകര്‍ക്കെതിരെയുള്ള നൂറോളം കേസുകളില്‍ തീരുമാനമാവാനുണ്ട്‌ എന്നും കേന്ദ്ര നിയമമന്ത്രി വെളിപ്പെടുത്തി.