ദ്വീപ്‌ എവിടെ? മെക്‌സിക്കോയില്‍ വിവാദം പുകയുന്നു

മെക്‌സിക്കോ സിറ്റി: മെക്‌സിക്കോയ്‌ക്കടുത്ത്‌ ഉള്‍ക്കടലിലെ ഒരു ദ്വീപ്‌ ഏതാനും വര്‍ഷങ്ങളായി കാണാനില്ലെന്ന്‌ പരാതി. ഗള്‍ഫ്‌ ഓഫ്‌ മെക്‌സിക്കോയിലെ യുകാറ്റന്‍ തീരത്തുള്ള ബെര്‍മിജ ദ്വീപാണ്‌ ഏവരെയും അമ്പരിപ്പിച്ചു കൊണ്ട്‌ തെളിവൊന്നും അവശേഷിപ്പിയ്‌ക്കാതെ കാണാതയിരിക്കുന്നത്‌. വന്‍ എണ്ണനിക്ഷേപമുള്ള ദ്വീപ്‌ കാണാതായ സംഭവം മെക്‌സിക്കോയില്‍ പുതിയ വിവാദത്തിന്‌ തിരികൊളുത്തിയിരിക്കുകയാണ്‌.

എണ്ണ ഖനനത്തിനുള്ള പുതിയ കരാറില്‍ മെക്‌സിക്കോയും അമേരിക്കയും ഒപ്പുവെക്കാനിരിക്കെയാണ്‌ ദ്വീപ്‌ കാണാതായ വാര്‍ത്ത വാര്‍ത്തകളില്‍ ഇടംപിടിച്ചിരിയ്‌ക്കുന്നത്‌. ഈ ദ്വീപ്‌ കൈവശമുണ്ടെങ്കില്‍ മെക്‌സിക്കോയുടെ സമുദ്രാതിര്‍ത്തി 55 മൈല്‍ കൂടി വടക്കോട്ടു നീളുകയും പ്രദേശത്തെ എണ്ണ നിക്ഷേപം രാജ്യത്തിന്‌ സ്വന്തമാകയും ചെയ്യുമായിരുന്നു.

ഇരുപതാം നൂറ്റാണ്ടിന്റെ പകുതിവരെ ദേശീയ അന്തര്‍ദേശീയ ഭൂപടങ്ങളില്‍ ബെര്‍മിജ ദ്വീപ്‌ വ്യക്തമായി അടയാളപ്പെടുത്തിയിരുന്നു. ദ്വീപ്‌ കാണാതായി സംബന്ധിച്ച്‌ പല വിധത്തിലുള്ള അഭ്യൂഹങ്ങളാണ്‌ പരക്കുന്നത്‌.

മെക്‌സിക്കോയുടെ എണ്ണ നിക്ഷേപ അവകാശവാദങ്ങള്‍ തകര്‍ക്കാന്‍ ശത്രുക്കള്‍ ഈ ദ്വീപിനെ സ്‌ഫോടനത്തിലൂടെ ഇല്ലാതാക്കിയന്നെ്‌ പലരും പറയുന്നു. അതുമല്ലെങ്കില്‍ എതെങ്കിലും ഭൂകമ്പം മൂലമുണ്ടായ വന്‍ വേലിയേറ്റത്തില്‍ ഈ ചെറുദ്വീപ്‌ മുങ്ങിപ്പോയതാകാമെന്നും സംശയമുണ്ട്‌.