ആസിയാന്: കേരളത്തിന് കാല്ക്കാശിന്റെ ഗുണമില്ല
തിരുവനന്തപുരം: ആസിയാന് കരാര് കൊണ്ട് കേരളത്തിന് കാല്ക്കാശിന്റെ ഗുണമില്ലെന്ന് മുഖ്യമന്ത്രി വിഎസ് അച്യുതാനന്ദന്. കരാര് സംബന്ധിച്ച് കേരളത്തിന്റെ ആശങ്ക വീണ്ടും കേന്ദ്രത്തെ ധരിപ്പിയ്ക്കുമെന്നും മുഖ്യമന്ത്രി നിയമസഭയില് പറഞ്ഞു. കരാര് വ്യവസ്ഥകളില് സംസ്ഥാനത്തിനുള്ള ആശങ്ക കേന്ദ്രത്തെ അറിയിയ്ക്കാനുളള ശ്രമങ്ങള് സംസ്ഥാനം നടത്തിക്കൊണ്ടിരിയ്ക്കുകയാണ്. ഇത് ഇനിയും തുടരും.
വിഷയത്തില് സര്വ്വകക്ഷി യോഗം വിളിയ്ക്കും. ആസിയാന് കരാറിനെ സംബന്ധിച്ച ആശങ്കകളെ പറ്റിപഠിക്കാന് കേന്ദ്രം മന്ത്രിസഭാസമിതി രൂപീകരിച്ചത് സംസ്ഥാനത്തെ അറിയിച്ചിട്ടില്ലെന്നും മുഖ്യമന്ത്രി അറിയിച്ചു.
അതേസമയം ആസിയാന് കരാറിന്റെ ഗുണങ്ങള് ഉപയോഗപ്പെടുത്താന് സംസ്ഥാന സര്ക്കാര് തയ്യാറാകണമെന്ന് പ്രതിപക്ഷം ആവശ്യപ്പെട്ടു. സംസ്ഥാനം കേന്ദ്രസര്ക്കാരിനെ അനാവശ്യമായി കുറ്റപ്പെടുത്തുകയാണെന്ന് പ്രതിപക്ഷം ആരോപിച്ചു.
ഓഗസ്റ്റ് 13 നാണ് ഇന്ത്യയും ആസിയാന് രാജ്യങ്ങളും തമ്മില് സ്വതന്ത്ര വ്യാപാര കരാറില് ഒപ്പ് വച്ചത്. കരാറിനെതിരെ കേരളമടക്കമുള്ള സംസ്ഥാനങ്ങള് പ്രതിഷേധവുമായി രംഗത്തെത്തിയതിനെ തുടര്ന്ന് ഇത് സംബന്ധിച്ച് പഠിയ്ക്കാനും പരിഹാരം നിര്ദ്ദേശിയ്ക്കാനുമായി പ്രണബ് മുഖര്ജി അധ്യക്ഷനായി കേന്ദ്രമന്ത്രിസഭാ ഉപസമിതിയ്ക്ക് രൂപം നല്കിയിരുന്നു. എകെ ആന്റണിയും വയലാര് രവിയും സമിതിയില് അംഗങ്ങളാണ്.