മാഫിയകള്ക്ക് പിന്നില് യുഡിഎഫ്: വൈക്കം വിശ്വന്
തിരുവനന്തപുരം: സര്ക്കാരിന്റെ ജനോപകാര പ്രവര്ത്തനങ്ങളെ തകര്ക്കാനും ആസിയാന് കരാറിന്മേലുള്ള ജനവികാരം തിരിച്ചുവിടാനും യുഡിഎഫും ചില മാധ്യമങ്ങളും ചേര്ന്ന് സിപിഎമ്മിനും സര്ക്കാരിനുമെതിരെ കുപ്രചരണം നടത്തുകയാണെന്ന് ഇടതുമുന്നണി ഏകോപനസമിതി കണ്വീനര് വൈക്കം വിശ്വന് വാര്ത്താ സമ്മേളനത്തില് പറഞ്ഞു.
കേരളത്തില് മാഫിയ സംഘങ്ങളെ വളര്ത്തിയത് യുഡിഎഫാണെന്ന് വൈക്കം വിശ്വന് ആരോപിച്ചു. അഴീക്കോടന് രാഘവനെ കൊലപ്പെടുത്തിയ മാഫിയ സംഘങ്ങള്ക്ക് സഹായം നല്കിയത് കോണ്ഗ്രസുകാരായിരുന്നു.
കണ്ണൂരില് ക്വട്ടേഷന് സംഘത്തെ അറസ്റ്റ് ചെയ്തപ്പോള് പോലീസ് സ്റ്റേഷനിലെത്തി അവരെ മോചിപ്പിച്ച കോണ്ഗ്രസ് നേതാവ് കെ സുധാകരന് എംപിയുടെ മാഫിയ ബന്ധം എല്ലാവര്ക്കും അറിവുള്ളതാണെന്നും വിശ്വന് പറഞ്ഞു.
സിപിഎം. കേന്ദ്ര കമ്മിറ്റിയംഗം ഇപി ജയരാജനെ കൊലപ്പെടുത്താന് ശ്രമിച്ചതും ഇതേ ശക്തികളാണ്. കേരളത്തിലെ ക്രമസമാധാന നില ഭദ്രമാണെന്ന് സുപ്രീം കോടതിയടക്കം സാക്ഷ്യപ്പെടുത്തിയിട്ടുണ്ടെന്നും വിശ്വന് ചൂണ്ടിക്കാട്ടി. പോള് വധക്കേസില് പിണറായി വിജയന് അമിത താത്പര്യം എന്ന മാധ്യമ പ്രവര്ത്തകന്റെ ചോദ്യത്തിന് പാര്ട്ടിയേയും സര്ക്കാരിനെയും വളഞ്ഞുനിന്ന് ആക്രമിക്കുമ്പോള് പിണറായി വിജയന് കൈയും കെട്ടി നില്ക്കണമോ എന്ന് വൈക്കം വിശ്വന് ചോദിച്ചു.