പ്രകാശും രാജേഷും റിമാന്‍ഡില്‍

ആലപ്പുഴ: പോള്‍ വധക്കേസില്‍ പ്രതികളായ ഓംപ്രകാശിനെയും പുത്തന്‍പാലം രാജേഷിനെയും 14 ദിവസത്തേക്ക്‌ റിമാന്‍ഡ്‌ ചെയ്‌തു.രാമങ്കരി മജിസ്‌ട്രേറ്റ്‌ കോടതി ജഡ്‌ജി സുബിത ചിറയ്‌ക്കലാണ്‌ ഇരുവരെയും റിമാന്‍ഡ്‌ ചെയ്‌തത്‌. പൊലീസ്‌ കസ്റ്റഡി കാലാവധി അവസാനിച്ച സാഹചര്യത്തിലാണ്‌ പൊലീസ്‌ ഗുണ്ടാത്തലവന്‍മാരെ കോടതിയില്‍ ഹാജരാക്കിയത്‌. ഇരുവരെയും പൂജപ്പുര സെന്‍ട്രല്‍ ജയിലിലേക്ക്‌ കൊണ്ടുപോയി.

ഈ മാസം 14നാണ്‌ രാമങ്കരി ഒന്നാം ക്ലാസ്‌ മജിസ്‌ട്രേറ്റ്‌ കോടതി തെളിവെടുപ്പിനായി ഏഴു ദിവസം കസ്‌റ്റഡിയില്‍ വിട്ടത്‌. ചോദ്യം ചെയ്യലും തെളിവെടുപ്പും പൂര്‍ത്തിയായതിനാലാണ്‌ ഗുണ്ടകളെ ജയിലിലേക്ക്‌ മടക്കി അയക്കുന്നത്‌. കൊച്ചി, ഇടുക്കി, മാരാരിക്കുളം, തൃശൂര്‍ എന്നിവിടങ്ങളില്‍ കൊണ്ടുപോയാണ്‌ പ്രതികളില്‍ നിന്ന്‌ തെളിവെടുത്തത്‌. കേസില്‍ 14, 15 പ്രതികളായാണ്‌ ഇവരെ ചേര്‍ത്തിരിക്കുന്നത്‌.

റിമാന്‍ഡ്‌ കാലവധി അവസാനിച്ചാലും ഗുണ്ടാനിയമ പ്രകാരം പൊലീസിന്‌ ഇവരെ വീണ്ടും അറസ്റ്റ്‌ ചെയ്യാനാകും. അതിനിടെ പോള്‍ വധവുമായി ബന്ധപ്പെട്ട്‌ കൂടുതല്‍ അറസ്‌റ്റ്‌ ഉടന്‍ ഉണ്ടാകുമെന്ന്‌ റിപ്പോര്‍ട്ടുകളുണ്ട്‌. ചങ്ങനാശ്ശേരിയില്‍ നിന്ന്‌ ക്വട്ടേഷന്‍ സംഘത്തെ ആലപ്പുഴയിലേക്ക്‌ വിളിച്ചു വരുത്തിയ അബിയെ കുറിച്ച്‌ പൊലീസിന്‌ വിവരം ലഭിച്ചിട്ടുണ്ട്‌. ദില്ലിയില്‍ നടത്തിയ അന്വേഷണത്തിനിടയിലാണ്‌ ഇയാളെക്കുറിച്ച്‌ പൊലീസിന്‌ വിവരം കിട്ടിയത്‌.