അഭയ കേസ് സാക്ഷിമൊഴികള് കൈമാറി
കൊച്ചി: സിസ്റ്റര് അഭയകേസിലെ കുറ്റപത്രത്തിന്റെ തുടര് നടപടികള് സംബന്ധിച്ച കേസ് 29 ലേക്കു മാറ്റി. അതിനിടെ പ്രതികളുടെ നാര്കോ പരിശോധനയുടെ സിഡി മാധ്യമങ്ങള് സംപ്രേഷണം ചെയ്തത് കോടതിയലക്ഷ്യമായി പരിഗണിക്കണമെന്ന് സിസ്റ്റര് സെഫിയുടെ അഭിഭാഷകന് കോടതിയില് ആവശ്യപ്പെട്ടു. ഇതുസംബന്ധിച്ച് പ്രത്യേക ഹര്ജി ചൊവ്വാഴ്ച കോടതിയില് സമര്പ്പിക്കും.
നാര്കോ സിഡി ഉള്പ്പെടെ പ്രതിഭാഗം ആവശ്യപ്പെട്ട ചില രേഖകള് കഴിഞ്ഞ തവണ കോടതി നല്കിയിരുന്നു. എന്നാല്, ലോക്കല് പൊലീസും ക്രൈംബ്രാഞ്ചും എടുത്ത സാക്ഷിമൊഴികളുടെ പകര്പ്പുകള് പ്രതിഭാഗത്തിന് ഇതുവരെ നല്കിയിട്ടില്ല.
പ്രതിഭാഗം ആവശ്യപ്പെട്ട കൂടുതല് തെളിവുകള് സിബിഐ സിജെഎം കോടതിയില് സമര്പ്പിച്ചു. കേസ് വിചാരണക്കായി സിബിഐ പ്രത്യേക കോടതിയിലേക്ക് മാറ്റുന്നതിന് മുന്പുള്ള നടപടി ക്രമങ്ങളാണ് സിജെഎം കോടതിയില് നടക്കുന്നത്.