കുരുന്നുകള്‍ ആദ്യാക്ഷരം കുറിച്ചു

തിരുവനന്തപുരം: വിജയദശമി ദിവസമായ തിങ്കളാഴ്‌ച രാവിലെ ആയിരക്കണക്കിന്‌ കുട്ടികള്‍ വിദ്യാരംഭത്തിനുള്ള ആദ്യാക്ഷരങ്ങള്‍ കുറിച്ചു. ക്ഷേത്രങ്ങള്‍ക്ക്‌ പുറമെ വിവിധ സാംസ്‌ക്കാരിക സമുദായിക സന്നദ്ധ സ്ഥാപനങ്ങളുടെ നേതൃത്വത്തില്‍ സംഘടിപ്പിച്ച എഴുത്തിനിരുത്തല്‍ വേദികളിലെല്ലാം വന്‍തിരക്കാണ്‌ അനുഭവപ്പെട്ടത്‌.

പ്രധാന ക്ഷേത്രങ്ങളായ കൊല്ലൂര്‍ മൂകാംബിക ക്ഷേത്രം, പറവൂരിലെ ദക്ഷിണമൂകാംബിക ക്ഷേത്രം, പനച്ചിക്കാട്‌ ക്ഷേത്രം, തൃശൂരിലെ തിരുവുള്ളക്കാവ്‌ തുടങ്ങി സംസ്ഥാനത്തെ മറ്റു പ്രധാനപ്പെട്ട സരസ്വതി ക്ഷേത്രങ്ങളിലെല്ലാം അറിവിന്റെ ആദ്യാക്ഷരങ്ങള്‍ കുറിയ്‌ക്കാന്‍ ആയിരങ്ങളാണെത്തിയത്‌.

ഇതിന്‌ പുറമെ തിരൂരിലെ തുഞ്ചന്‍പ്പറമ്പ്‌, തിരുവനന്തപുരം ഐരാണിമുട്ടത്തിലെ തുഞ്ചന്‍സ്‌മാരകം തുടങ്ങി സംസ്ഥാനത്തൊട്ടാകെയുള്ള സാംസ്‌കാരിക സ്ഥാപനങ്ങളിലൊക്കെ തിങ്കളാഴ്‌ച എഴുത്തിനിരുത്ത്‌ ചടങ്ങുകള്‍ നടന്നു. കലാസാംസ്‌കാരിക രംഗത്തെ ഒട്ടേറെ പ്രമുഖര്‍ എഴുത്തിനിരുത്ത്‌ ചടങ്ങില്‍ പങ്കെടുത്തു. കേരളത്തിന്‌ പുറമെ ലോകമാകമാനമുള്ള മലയാളികള്‍ വിജയദശമിയും മഹാനവമിയും ആഘോഷിക്കുകയാണ്‌.

മഹാനവമിയായ ഞായറാഴ്‌ച പൂജയ്‌ക്കുവച്ച തൊഴില്‍-പഠനോപകരണങ്ങള്‍ തിങ്കളാഴ്‌ച എടുക്കും. പ്രത്യേക നവരാത്രി പൂജകള്‍ക്കായി ആയിരക്കണക്കിന്‌ വിശ്വാസികള്‍ ക്ഷേത്രസന്ദര്‍ശനം നടത്തുകയുണ്ടായി. വിവിധ ക്ഷേത്രങ്ങളില്‍ ശനിയാഴ്‌ച വൈകിട്ട്‌ പൂജ വയ്‌പ്പിനായി വന്‍ തിരക്കനുഭവപ്പെട്ടിരുന്നു.