പൈലറ്റുമാര്‍ ജോലിക്ക്‌ കയറണം: പ്രഫുല്‍ പട്ടേല്‍

ദില്ലി: സമരത്തിലേര്‍പ്പെട്ട എയര്‍ ഇന്ത്യ ജീവനക്കാര്‍ ബുധനാഴ്‌ച മുതല്‍ ജോലിയില്‍ തിരികെ പ്രവേശിയ്‌ക്കണമെന്ന്‌ കേന്ദ്ര വ്യോമയാന മന്ത്രി പ്രഫുല്‍ പട്ടേല്‍ ആവശ്യപ്പെട്ടു. അല്ലാത്ത പക്ഷം ഇവര്‍ക്കെതിരെ കര്‍ശന നടപടികള്‍ സ്വീകരിയ്‌ക്കാന്‍ മാനേജ്‌മെന്റിന്‌ അധികാരമുണ്ടായിരിക്കുമെന്ന്‌ അദ്ദേഹം മുന്നറിയിപ്പ്‌ നല്‍കി.

രാജ്യത്തിന്റെ അഭിമാനസ്‌തംഭമാണ്‌ എയര്‍ ഇന്ത്യ. കാര്യങ്ങള്‍ വിശാലതലത്തില്‍ കണ്ട്‌ കാര്യങ്ങള്‍ മനസിലാക്കി പ്രവര്‍ത്തിക്കാന്‍ ജീവനക്കാര്‍ തയാറാകണം. എയര്‍ ഇന്ത്യക്ക്‌ ചെലവു ചുരുക്കല്‍ ഒഴിവാക്കാനാവാത്തതാണ്‌. കമ്പനിയുടെ പ്രശ്‌നങ്ങള്‍ സര്‍ക്കാര്‍ സജീവമായി പരിഗണിക്കുന്നുണ്ട്‌. പ്രശ്‌ന പരിഹാരങ്ങള്‍ക്ക്‌ സര്‍ക്കാര്‍ ശ്രമിക്കും. സര്‍ക്കാരിന്റെ ശ്രമങ്ങളുമായി എല്ലാ ജീവനക്കാരും സഹകരിക്കണം. ഇതുവരെ ആരുടെയും ആനുകൂല്യങ്ങള്‍ മാനേജ്‌മെന്റ്‌ കുറച്ചിട്ടില്ലെന്നും മന്ത്രി പറഞ്ഞു.

അതേ സമയം പണിമുടക്ക്‌ അവസാനിപ്പിക്കുന്നതിനായി സംഘടനയുമായി ബുധനാഴ്‌ച നടത്തിയ ചര്‍ച്ചയും പരാജയപ്പെട്ടു. സമരത്തോട്‌ അനുഭാവം പ്രകടിപ്പിച്ച്‌ മറ്റു ചില സംഘടനകളും രംഗത്തെത്തിയിട്ടുണ്ട്‌.