ആണവ നിര്‍വ്യാപനം പരാജയം : മന്‍മോഹന്‍

ദില്ലി: ആണവായുധ വ്യാപനം തടയുന്നതില്‍ നിലവിലെ ആണവ നിര്‍വ്യാപന സംവിധാനങ്ങള്‍ പരാജയപ്പെട്ടുവെന്ന്‌ പ്രധാനമന്ത്രി മന്‍മോഹന്‍ സിങ്‌. ആണവ പദ്ധതികള്‍ സംബന്ധിച്ച വിവേചനം അവസാനിപ്പിച്ചാല്‍ മാത്രമേ ആണവ നിര്‍വ്യാപനം സംബന്ധിച്ച രണ്ടു കരാറുകളിലും ഇന്ത്യ ഒപ്പിടുകയുള്ളുവെന്നും അദ്ദേഹം വ്യക്തമാക്കി. ആണവോര്‍ജ്ജത്തിന്റെ സമാധാനപരമായ ഉപയോഗം എന്ന വിഷയത്തെക്കുറിച്ച്‌ ദില്ലിയില്‍ നടക്കുന്ന ത്രിദിന രാജ്യാന്തര സമ്മേളനം ഉദ്‌ഘാടനം ചെയ്യുകയായിരുന്നു പ്രധാനമന്ത്രി.

സമഗ്രവും വിവേചനരഹിതവുമായ ആണവനിര്‍വ്യാപനമാണ്‌ ആവശ്യം. ആഗോളതലത്തില്‍ ആണവനിര്‍വ്യാപനം സാധ്യമാകണമെങ്കില്‍ അണ്വായുധങ്ങള്‍ പൂര്‍ണമായും ഇല്ലാതാക്കേണ്ടി വരും. ഇന്ത്യ ആണവപരീക്ഷണത്തിന്‌ ഏകപക്ഷീയമായി പ്രഖ്യാപിച്ച മൊറട്ടോറിയം തുടരും. മനുഷ്യനെ കൂട്ടത്തോടെ കൊന്നൊടുക്കുന്ന ആയുധങ്ങള്‍ വ്യാപിക്കുന്നത്‌ തടയാനുള്ള ശ്രമം രാജ്യം പ്രതിബദ്ധതയോടെ മുന്നോട്ടുകൊണ്ടു പോകുമെന്നും പ്രധാനമന്ത്രി പറഞ്ഞു.

ആണവ നിര്‍വ്യാപന പദ്ധതിയില്‍ എല്ലാ രാജ്യങ്ങളെയും ഉള്‍പ്പെടുത്തുന്നതിന്‌ സമ്മര്‍ദ്ദം ചെലുത്തുന്നതു ലക്ഷ്യമിട്ട്‌ അമേരിക്കയുടെ പിന്തുണയോടെ യുഎന്‍ രക്ഷാസമിതി പ്രമേയം പാസാക്കിയതിനു പിന്നാലെയാണ്‌ പ്രധാനമന്ത്രി ഇത്തരത്തില്‍ അഭിപ്രായപ്രകടനം നടത്തിയത്‌.