മുംബൈ ഭീകരാക്രമണം: വിചാരണ മാറ്റിവെച്ചു
റാവല്പിണ്ടി: മുംബൈ ഭീകരാക്രമണ കേസിലെ പ്രതികളായ ലഷ്കര് ഇ തൊയ്ബ അംഗങ്ങളുടെ വിചാരണ പാക് കോടതി ഒക്ടോബര് പത്തിലേക്ക് മാറ്റി. ഇത് രണ്ടാം തവണയാണ് കോടതി വിചാരണ നടപടികള് മാറ്റിവെയ്ക്കുന്നത്. പ്രധാനപ്രതി സഖിയൂര് റഹ്മാന് ലഖ്വി ഉള്പ്പെടെ ഭീകരാക്രമണത്തില് പ്രതികളായ ഏഴ് പേരുടെ വിചാരണയാണ് ശനിയാഴ്ച നടക്കേണ്ടിയിരുന്നത്.
കേസ് പരിഗണിക്കുന്ന ഭീകരവിരുദ്ധ കോടതി ജഡ്ജി ബാഖിര് അലി റാണ അവധിയായതിനെ തുടര്ന്നാണ് കേസ് മാറ്റിയത്. റാവല്പ്പിണ്ടിയിലെ അദിയാല ഭീകര വിരുദ്ധ കോടതിയാണ് കേസ് പരിഗണിക്കുന്നത്.
ശനിയാഴ്ചത്തെ വിചാരണയില് പ്രതികളുടെ മേല് കുറ്റം ചുമത്തുമെന്നാണ് കരുതിയിരുന്നത്. കനത്ത സുരക്ഷയാണ് വിചാരണക്കോടതിയ്ക്ക് ചുറ്റും ക്രമീകരിച്ചിരുന്നത്. കഴിഞ്ഞ മാസം 26ന് കേസ് പരിഗണിച്ചിരുന്നെങ്കിലും ജഡ്ജി അവധിയായതിനാല് കേസ് ഒക്ടോബകര് മൂന്നിലേക്ക് മാറ്റുകയായിരുന്നു.
ന്യൂയോര്ക്കില് യുഎന് ജനറല് അസംബ്ലിയ്ക്കിടെ നടന്ന ഇന്ത്യ-പാക് വിദേശകാര്യ മന്ത്രിമാരുടെ കൂടിക്കാഴ്ചയില് വിചാരണ ഉടന് പുനരാരംഭിക്കുമെന്ന് പാക് വിദേശകാര്യമന്ത്രി ഷാ മെഹമ്മൂദ് ഖുറേഷി ഇന്ത്യന് വിദേശകാര്യമന്ത്രി എസ്എം കൃഷ്ണയ്ക്ക് ഉറപ്പു നല്കിയിരുന്നു.
കേസ് അടുത്ത പത്താം തീയതി വീണ്ടും പരിഗണിക്കുമെന്ന് അധികൃതര് അറിയിച്ചു. ലഷ്കര് മേധാവി സക്കീവുര് റഹ്മാന് അടക്കം ഏഴുപേരാണ് കേസില് വിചാരണ നേരിടുന്നത്.
മുംബൈ ആക്രമണത്തില് നേരിട്ട് പങ്കെടുത്ത 10 പേര്ക്ക് പരിശീലനം, ആയുധങ്ങള്, താമസം, സാമ്പത്തിക സഹായം, വിവരം കൈമാറ്റം ചെയ്യല് എന്നീ സഹായങ്ങള് ചെയ്ത് കൊടുത്തുവെന്നാണ് ഇവര്ക്കെതിരായ കുറ്റം.