ദലൈലാമയെ ഒഴിവാക്കി ഒബാമ ചൈനയിലേക്ക്
വാഷിങ്ടണ്: കാലാകാലങ്ങളായി അമേരിക്ക പിന്തുടര്ന്ന് വന്ന ടിബറ്റന് അനുകൂല നയം തിരുത്തിയെഴുതപ്പെടുന്നു. ടിബറ്റന് ആത്മീയ നേതാവ് ദലൈലാമയുടെ യുഎസ് സന്ദര്ശനത്തിനിടെ പ്രസിഡന്റ് ബരാക് ഒബാമ അദ്ദേഹവുമായി നടത്താനിരുന്ന കൂടിക്കാഴ്ച ഉപേക്ഷിച്ചതാണ് ഇത്തരമൊരു സൂചന നല്കുന്നത്.
കഴിഞ്ഞ പതിനെട്ട് വര്ഷത്തിനിടെ ഇതാദ്യമായാണ് ഒരു യുഎസ് പ്രസിഡന്റ് ദലൈലാമയുമായുള്ള കൂടിക്കാഴ്ച വേണ്ടെന്ന് വെയ്ക്കുന്നത്. അടുത്ത മാസം ചൈന സന്ദര്ശിയ്ക്കുന്ന ഒബാമ ചൈനീസ് ഭരണകൂടത്തിന്റെ അപ്രീതി സമ്പാദിയ്ക്കാതിരിയ്ക്കാനാണ് ദലൈലാമയുമുയുള്ള കൂടിക്കാഴ്ച ഉപേക്ഷിച്ചതെന്ന് കരുതപ്പെടുന്നു. ഈയാഴ്ചയാണ് ദലൈലാമ അമേരിക്കയിലെത്തുന്നത്.
ഒബാമയുടെ നടപടിയ്ക്കെതിരെ നിശിത വിമര്ശനമാണ് ഉയരുന്നത്. ചൈനയ്ക്ക് മുന്നില് ഒബാമ പൂച്ചയായി മാറിയെന്നാണ് റിപ്പബ്ളിക്കന് അംഗങ്ങള് പരിഹസിയ്ക്കുന്നുത്. സ്വന്തം പാര്ട്ടിയായ ഡെമോക്രാറ്റുകള്ക്കിടയിലും ഇത് അതൃപ്തി സൃഷ്ടിച്ചിട്ടുണ്ട്.
ലാന്റോസ് ഫൗണ്ടേഷന് നല്കുന്ന മനുഷ്യാവകാശ പോരാട്ടത്തിനുള്ള പുരസ്ക്കാരം സ്വീകരിയ്ക്കാനാണ് ലാമ യുഎസ് ക്യാപിറ്റോളില് എത്തുന്നത്. ടിബറ്റന് പ്രക്ഷോഭങ്ങളോട് അനുഭാവം പ്രകടിപ്പിയ്ക്കുന്ന സ്പീക്കര് നാന്സി പെലോസിയാണ് ദലൈലാമയ്ക്ക് പുരസ്ക്കാരം നല്കുന്നത്. ഈ സമയം ഒബാമ ക്യാപിറ്റോളിലുണ്ടെങ്കിലും കൂടിക്കാഴ്ച വേണ്ടെന്ന് തീരുമാനിക്കുകയായിരുന്നു. കൂടിക്കാഴ്ച ഉപേക്ഷിച്ചത് ദലൈലാമയേയും അദ്ദേഹത്തിന്റെ അനുയായികളേയും നിരാശപ്പെടുത്തിയിട്ടുണ്ട്.
ദലൈലാമയെ ആദരിയ്ക്കുന്നതും അദ്ദേഹവുമായി കൂടിക്കാഴ്ച നടത്തുന്നതും എല്ലായ്പോഴും ചൈനയെ പ്രകോപിപ്പിയ്ക്കുന്ന വിഷയമാണ്. 1991 മുതല് എല്ലാ പ്രസിഡന്റുമാരുമായും അമേരിക്കന് സന്ദര്ശനത്തിനിടെ ദലൈലാമ ചര്ച്ചകള് നടത്തിപ്പോരുന്നുണ്ട്. ഒബാമയും നേരത്തെ ലാമയെ കാണാന് നിശ്ചയിച്ചിരുന്നു. എന്നാല് ചൈന സന്ദര്ശനം അടുത്തെത്തിയ പശ്ചാത്തലത്തില് കൂടിക്കാഴ്ചയില് നിന്ന് തന്ത്രപൂര്വം പിന്മാറാന് ഒബാമ തീരുമാനിയ്ക്കുകയായിരുന്നു.