ജലഗതാഗത നിയമം ഭേദഗതി ചെയ്യും
തിരുവനന്തപുരം: സംസ്ഥാനത്തെ ഏകീകൃത ജലഗതാഗത നിയമവും ചട്ടവും ഉടന് ഭേദഗതി ചെയ്യുമെന്ന് മുഖ്യമന്ത്രി വിഎസ് അച്യുതാനന്ദന് അറിയിച്ചു.
ടൂറിസ്റ്റ് സര്വീസ് നടത്തുന്ന എല്ലാ ബോട്ടുകളിലും സുരക്ഷ കര്ശനമാക്കുമെന്നും മന്ത്രിസഭാ തീരുമാനങ്ങള് വിശദീകരിച്ചുകൊണ്ട് മുഖ്യമന്ത്രി പറഞ്ഞു. തേക്കടി ദുരന്തം സംബന്ധിച്ച് ക്രൈം ബ്രാഞ്ചിന്റേയും ജില്ലാ കളക്ടറുടേയും റിപ്പോര്ട്ടുകള് പരിശോധിച്ച ശേഷം ആവശ്യമായ നടപടികള് സ്വീകരിയ്ക്കും.
വര്ക്കലയില് ദളിത് ഹ്യുമന് റൈറ്റ്സ് മൂവ്മെന്റ് (ഡിഎച്ച്ആര്എം) പ്രവര്ത്തകരുടെ ആക്രമണത്തില് കൊല്ലപ്പെട്ട ശിവപ്രസാദിന്റെ കുടുംബത്തിന് രണ്ടു ലക്ഷം രൂപ ധനസഹായം നല്കും. ആക്രമണത്തില് പരിക്കേറ്റ രണ്ടു പേര്ക്ക് ഒരു ലക്ഷവും അമ്പതനായിരവും വീതം ധനസഹായം നല്കും. സിനിമ -സീരിയല് നടി ശാന്താ ദേവിക്ക് ഒരു ലക്ഷം രൂപ ചികിത്സാസഹായം നല്കുമെന്നും മുഖ്യമന്ത്രി അറിയിച്ചു.
ആസിയാന് കരാര് സംബന്ധിച്ച കേന്ദ്രവാണിജ്യ മന്ത്രി ആനന്ദ് ശര്മയുടെ പ്രസ്താവന യഥാര്ഥ വസ്തുതകള് മറച്ചു വയ്ക്കാനാണെന്നു വിഎസ് കുറ്റപ്പെടുത്തി. ആസിയാന് കരാറിനെതിരെ കേരളത്തിന്റെ പ്രതിഷേധം പ്രകടിച്ചപ്പോള് തടിതപ്പാനുള്ള ശ്രമമാണ് കേന്ദ്ര വാണിജ്യ മന്ത്രി ആനന്ദ് ശര്മ നടത്തുന്നതെന്നും മുഖ്യമന്ത്രി പറഞ്ഞു. ക്ലാസ് വണ്, ക്ലാസ് ഫോര് വിഭാഗങ്ങളിലെ 30 തസ്തികകളില് വകലാംഗര്ക്ക് നിയമനം നല്കാന് മന്ത്രിസഭായോഗത്തില് തീരുമാനമായി.