മാധ്യമങ്ങള്‍ ഗോസിപ്പെഴുതുന്നു: കോടിയേരി

തിരുവനന്തപുരം: മാധ്യമങ്ങള്‍ക്ക്‌ വീണ്ടും ആഭ്യന്തര മന്ത്രി കോടിയേരി ബാലകൃഷ്‌ണന്റെ രൂക്ഷവിമര്‍ശനം. എഴുതുന്ന കാര്യങ്ങള്‍ സത്യമെന്ന്‌ ഉറപ്പിയ്‌ക്കാന്‍ ഇപ്പോഴത്തെ മാധ്യമപ്രവര്‍ത്തകര്‍ ശ്രമിയ്‌ക്കുന്നില്ലെന്ന്‌ മന്ത്രി പറഞ്ഞു.

ഗോസിപ്പ്‌ വാര്‍ത്തകള്‍ക്കാണ്‌ ഇന്ന്‌ മാധ്യമങ്ങള്‍ പ്രധാന്യം നല്‍കുന്നത്‌. മുന്‍കാലത്ത്‌ ഇത്തരം എഴുത്തിനെ മഞ്ഞപത്രപ്രവര്‍ത്തനം എന്നാണ്‌ വിശേഷിപ്പിച്ചിരുന്നത്‌.

വാര്‍ത്തകള്‍ സൃഷ്‌ടിക്കുന്നതിന്‌ പകരം വസ്‌തുതാപരമായി വാര്‍ത്തകള്‍ ജനമധ്യത്തിലെത്തിച്ച്‌ സമൂഹത്തെ ചലനാത്മകമാക്കുക എന്ന ഉത്തരവാദിത്വം മാധ്യമങ്ങള്‍ക്കുണ്ടെന്ന്‌ കോടിയേരി ചൂണ്ടിക്കാട്ടി.