മാവോവാദികള്‍ക്ക്‌ എല്‍ടിടിഇ ബന്ധം

വിശാഖപട്ടണം: തമിഴ്‌ പുലികളുമായി മാവോവാദികള്‍ക്ക്‌ ബന്ധമുണ്ടെന്ന്‌ തെളിയിക്കുന്ന വിവരങ്ങള്‍ രഹസ്യാന്വേഷണ ഏജന്‍സികല്‍ക്ക്‌ ലഭിച്ചതായി മന്ത്രി പി ചിദംബരം വെളിപ്പെടുത്തി.

ഇക്കാര്യം കണക്കിലെടുത്ത്‌ ആന്ധ്ര്‌, തമിഴ്‌നാട്‌, ഒറീസ, ചത്തീസ്‌ഗഡ്‌ തുടങ്ങിയ സംസ്ഥാനങ്ങള്‍ക്ക്‌ കേന്ദ്ര രഹസ്യാന്വേഷണ വിഭാഗം മുന്നറിയിപ്പ്‌ നല്‍കിയിട്ടുണ്ട്‌.

ദക്ഷിണേന്ത്യയിലെ വനപ്രദേശങ്ങളില്‍ റെഡ്‌ ഗറില്ലകളും തമിഴ്‌പുലികളും ചേര്‍ന്ന്‌ പരിശീലനവും യോഗങ്ങളും സംഘടിപ്പിക്കുന്നുണ്ടെന്നും വിവരം ലഭിച്ചതായി ചിദംബരം പറഞ്ഞു.

മാവോവാദികളുമായി ബന്ധം സ്ഥാപിക്കാനായി തമിഴ്‌പുലികളുടെ 12അംഗസംഘം ഇന്ത്യയിലെത്തിയതായി വിവരം ലഭിച്ചിട്ടുണ്ട്‌. കേരളത്തിന്റെ തീരപ്രദേശത്തുകൂടി ഇന്ത്യയിലേക്ക്‌ കടന്ന പുലികള്‍ മൂന്ന്‌ ഗ്രൂപ്പുകളായി തിരഞ്ഞ്‌ ആന്ധ്രയിലേക്കാണ്‌ പോയതെന്നും രഹസ്യാന്വേഷണ ഏജന്‍സിയുടെ റിപ്പോര്‍ട്ടില്‍ പറയുന്നു.

പുലികള്‍ മാവോവാദികള്‍ക്ക്‌ ആയുധങ്ങള്‍ നല്‍കാറുണ്ടെന്നും റിപ്പോര്‍ട്ടില്‍ പരാമര്‍ശമുണ്ട്‌. ശ്രീലങ്കയില്‍ സംഘടനയെ ശക്തപ്പെടുത്തുന്നതുവരെ ദക്ഷിണേന്ത്യ കേന്ദ്രമാക്കി പ്രവര്‍ത്തിക്കാനാണ്‌ എല്‍ടിടിയുടെ പദ്ധതിയെന്നാണ്‌ സൂചന.

മാവോവാദികളും തമിഴ്‌പുലികളുമായി ഒന്നിച്ച്‌ പ്രവര്‍ത്തിക്കാന്‍ തുടങ്ങിയാല്‍ അത്‌ രാജ്യത്തിന്‌ വന്‍ സുരക്ഷാ ഭീഷണിയുയര്‍ത്തുമെന്നാണ്‌ വിലയിരുത്തപ്പെടുന്നത്‌.