മുല്ലപ്പെരിയാറില്‍ ഭൂകന്പസാധ്യത:ഐഐടി റിപ്പോര്‍ട്ട്

ദില്ലി: മുല്ലപ്പെരിയാര്‍ അണക്കെട്ട്‌ സ്ഥിതി ചെയ്യുന്ന പ്രദേശം ഭൂകമ്പ സാധ്യത മേഖലയിലാണെന്ന്‌ റൂര്‍ക്കി ഐഐടിയുടെ പഠന റിപ്പോര്‍ട്ട്‌. റിച്ചര്‍ സ്‌ക്കെയിലില്‍ 6.5 തീവ്രതയുള്ള ചലനത്തില്‍ അണക്കെട്ടും ബേബി ഡാമും തകരാന്‍ സാധ്യതയുള്ളതായും റിപ്പോര്‍ട്ടില്‍ പറയുന്നു.

മുല്ലപ്പെരിയാര്‍ അണക്കെട്ട്‌ നിലനില്‍ക്കുന്ന 300 കിലോമീറ്റര്‍ ചുറ്റളവില്‍ ഭൂകമ്പ സാധ്യതയുള്ള 22 പ്രദേശങ്ങള്‍ അന്വേഷണത്തില്‍ കണ്ടെത്തിയതായി റിപ്പോര്‍ട്ടില്‍ പറയുന്നു. ഈ മേഖലയില്‍ എവിടെയെങ്കിലും റിക്ടര്‍ സ്‌കെയിലില്‍ 6.5 രേഖപ്പെടുത്തുന്ന ഭൂചലനം ഉണ്ടാവുകയാണെങ്കില്‍ മുല്ലപ്പെരിയാര്‍ അണക്കെട്ടും ബേബി ഡാമും തകരും. അതിനാല്‍ നിലവിലെ അണക്കെട്ട്‌ ഇപ്പോഴത്തെ രീതിയില്‍ മുന്നോട്ടു പോകുന്നത്‌ ഒട്ടും സുരക്ഷിതമല്ലെന്നും റിപ്പോര്‍ട്ടില്‍ വിശദീകരിയ്‌ക്കുന്നു.

രണ്ട്‌ ഐഐടികളെയാണ്‌ മുല്ലപ്പെരിയാറിന്റെ സുരക്ഷയെ കുറിച്ച്‌ പഠിയ്‌ക്കാന്‍ കേരള സര്‍ക്കാര്‍ നിയോഗിച്ചത്‌. ദില്ലി ഐഐടി മുല്ലപ്പെരിയാറിലെ വെള്ളപ്പൊക്ക സാധ്യതകളെക്കുറിച്ചു പഠിച്ചു നേരത്തെ റിപ്പോര്‍ട്ട്‌ സമര്‍പ്പിച്ചിരുന്നു. ഇതിന്‌ പിന്നാലെയാണു റൂര്‍ക്കി ഐഐടി മുല്ലപ്പെരിയാറിലെ ഭൂകമ്പസാധ്യതയെക്കുറിച്ചു സംസ്ഥാന സര്‍ക്കാരിന്‌ അന്തിമ റിപ്പോര്‍ട്ട്‌ സമര്‍പ്പിച്ചിരിക്കുന്നത്‌.

റിപ്പോര്‍ട്ട്‌ മുല്ലപ്പെരിയാര്‍ കേസിന്റെ അന്തിമ വാദത്തിനിടെ സുപ്രീം കോടതിയ്‌ക്ക്‌ മുന്‍പാകെ കൊണ്ടു വരും. പ്രത്യേക അപേക്ഷ നല്‍കി റിപ്പോര്‍ട്ട്‌ കോടതിയില്‍ സമര്‍പ്പിയ്‌ക്കുന്നതിനാണ്‌ സംസ്ഥാന സര്‍ക്കാര്‍ ആലോചിയ്‌ക്കുന്നത്‌.

ഇന്ത്യയിലെ പ്രമുഖ ഭൂകമ്പസാധ്യത പഠന കേന്ദ്രമാണ്‌ റൂര്‍ക്കിയിലെ ഐഐടി. പ്രധാനമന്ത്രിയുടെ സീസ്‌മോളജിക്കല്‍ കമ്മിറ്റിയിലെ ഉപദേഷ്ടാക്കള്‍ അടങ്ങിയ സംഘമാണ്‌ പഠനം നടത്തിയിരിക്കുന്നത്‌. ലോകത്തെങ്ങും അംഗീകാരമുള്ള ശാസ്‌ത്രീയ മാനദണ്‌ഡങ്ങള്‍ പാലിച്ചുള്ള ഡൈനാമിക്‌ സ്റ്റഡിയാണ്‌ റൂര്‍ക്കി ഐഐടി മുല്ലപ്പെരിയാറില്‍ നടത്തിയത്‌.