മുറച്ചെറുക്കനും മുറപ്പെണ്ണിനും കോടതിയില്‍ നിശ്ചയം

തിരുവനന്തപുരം: ഒളിച്ചോടിയ മുറപ്പെണ്ണിനും മുറച്ചെറുക്കനും കോടതി മുറിയില്‍ വിവാഹനിശ്ചയം. ഒക്ടോബര്‍ 11ന്‌ മുറച്ചെറുക്കനോടൊപ്പം ഒളിച്ചോടിയ പ്ലസ് വണ്‍കാരിയെ സ്വീകരിക്കാന്‍ വീട്ടുകാര്‍ തയ്യാറാവാഞ്ഞതിനെത്തുടര്‍ന്നാണ്‌ കോടതി വിവാഹനിശ്ചയം നടത്തിയത്‌.

2010ല്‍ ഇരുവര്‍ക്കും വിവാഹപ്രായം തികയുമ്പോള്‍ വിവാഹം നടത്താമെന്ന്‌ മുറച്ചെറുക്കന്റെ വീട്ടുകാര്‍ മജിസ്‌ട്രേട്ടിന്‌ ഉറപ്പ്‌ നല്‍കി. തുടര്‍ന്ന്‌ കുട്ടിയെ മുറച്ചെറുക്കന്റെ വീട്ടുകാര്‍ക്കൊപ്പം അയച്ചു.

അച്ഛന്റെ സഹോദരിയുടെ മകനുമായി പ്രണയത്തിലായിരുന്നു പെണ്‍കുട്ടി. യുവാവിന്‌ 20വയസ്സായതേയുള്ളു. ഇവരുടെ പ്രണയബന്ധം അംഗീകരിക്കാന്‍ പെണ്‍കുട്ടിയുടെ വീട്ടുകാര്‍ തയ്യാറായിരുന്നില്ല.

തുടര്‍ന്ന്‌ ഇരുവരും ഒളിച്ചോടി. ഇതോടെ പെണ്‍കുട്ടിയുടെ വീട്ടുകാര്‍ ഹൈക്കോടതിയില്‍ ഹേബിയസ്‌ കോര്‍പ്പസ്‌ ഹര്‍ജി നല്‍കി. ഇത്‌ പരിഗണിക്കാനിരിക്കേ ഇരുവരും ചൊവ്വാഴ്‌ച തിരുവനന്തപുരം ജുഡീഷ്യല്‍ ഒന്നാം ക്ലാസ്‌ മജിസ്‌ട്രേട്ട്‌ കോടതിയില്‍ ഹാജരായി.

ഇരുവരോടും വീട്ടുകാര്‍ക്കൊപ്പം ബുധനാഴ്‌ച ഹാജരാകാന്‍ മജിസ്‌ട്രേട്ട്‌ നിര്‍ദ്ദേശിച്ചു. ബുധനാഴ്‌ച വൈകീട്ട്‌ ഹാജരായപ്പോള്‍ കുട്ടിയെ തങ്ങള്‍ക്ക്‌ വേണ്ടെന്ന്‌ പെണ്‍കുട്ടിയുടെ വീട്ടുകാര്‍ വ്യക്തമാക്കുകയായിരുന്നു. തുടര്‍ന്നാണ്‌ മജിസ്‌ട്രേട്ട്‌ ഇരുവരുടെയും വിവാഹം പറഞ്ഞ്‌ ഉറപ്പിച്ച്‌ വിട്ടയച്ചത്‌.