ലൗ ജിഹാദ്‌: സിഐഡി സംഘം കേരളത്തില്‍

കൊച്ചി: പ്രണയം നടിച്ച്‌ അന്യമതങ്ങളിലെ പെണ്‍കുട്ടികളെ ഇസ്ലാമിലേക്ക്‌ മതം മാറ്റുന്ന ലൗ ജിഹാദ്‌ പ്രവര്‍ത്തെക്കുറിച്ച്‌ അന്വേഷിക്കുന്നതിന്റെ ഭാഗമായി കര്‍ണാടക പൊലീസ്‌ വ്യാഴാഴ്‌ച കേരളത്തിലെത്തി വിവരം ശേഖരിച്ചു.

കര്‍ണാടക സിഐഡി സംഘം പ്രോസിക്യൂഷന്‍ ഡയറക്ടര്‍ ജനറല്‍ വി ജി ഗോവിന്ദന്‍നായരെ സന്ദര്‍ശിച്ചു. കേരള ഹൈക്കോടതിയില്‍ ഇതുസംബന്ധിച്ച്‌ നടക്കുന്ന കേസിന്റെ വിശദാംശങ്ങളും സംഘം ശേഖരിച്ചിട്ടുണ്ട്‌.

ഈ വിഷയത്തില്‍ കര്‍ണാടക ഹൈക്കോടതി സിഐഡി അന്വേഷണത്തിന്‌ ഉത്തരവിട്ടിരിക്കുകയാണ്‌. ചാമരാജ്‌നഗര്‍ ജില്ലയില്‍ താമസിക്കുന്ന കണ്ണൂര്‍ സ്വദേശികളായ മാതാപിതാക്കളുടെ പാരതിയിന്മേലാണ്‌ കര്‍ണാടക ഹൈക്കോടതിയുടെ നിര്‍ദ്ദേശം.

പെണ്‍കുട്ടികളെ അന്യമതത്തിലേക്ക്‌ ചേര്‍ക്കുന്നതിനുള്ള ശ്രമം നടക്കുന്നുണ്ടോ ഇതിനെ പ്രോത്സാഹിപ്പിക്കുന്നതിനും ധനസഹായം നല്‍കുന്നതിനുമായി ഏതെങ്കിലും സംഘടനകള്‍ പ്രവര്‍ത്തിക്കുന്നുണ്ടോ എന്നീ കാര്യമാണ്‌ സിഐഡി സംഘം അന്വേഷിക്കുന്നത്‌.

കേരളത്തിന്റെ പലഭാഗങ്ങളിലും കര്‍ണാടകത്തില്‍ മംഗലാപുരം മേഖലയിലും ഇങ്ങനെ പ്രണയം നടിച്ച്‌ മതംമാറ്റുന്ന സംഘങ്ങള്‍ പ്രവര്‍ത്തിക്കുന്നുണ്ടെന്ന്‌ വ്യാപകമായി ആരോപണം ഉയരുന്നുണ്ട്‌. കേരളത്തില്‍ കാത്തലിക്ക്‌ ചര്‍ച്ച്‌ ഇതിനെതിരെ ലഘുലേഖ ഇറക്കിയിരുന്നു.