സുരേഷ് കുമാറിന് ഭരണപരിഷ്കരണവകുപ്പില് നിയമനം
തിരുവനന്തപുരം: മൂന്നാര് ദൗത്യ സംഘത്തിന്റെ മുന് തലവന് കെ സുരേഷ് കുമാര് ഐഎഎസിന് ഭരണപരിഷ്കാരവകുപ്പില് നിയമിക്കാന് സര്ക്കാര് തീരുമാനിച്ചു.
കാര്ഷിക വികസന ബാങ്ക് തലവനായിരിക്കെ മുഖ്യമന്ത്രിയുടെ ഓഫീസുമായി ബന്ധപ്പെട്ട പരസ്യപ്രസ്താവനക്കെതിരെ സിപിഎമ്മിലെ ഒരു വിഭാഗം തിരിഞ്ഞതോടെ ഇദ്ദേഹം സസ്പെന്ഷനില് ആയിരുന്നു.
അച്ചടക്കനടപടിയുടെ ഭാഗമായി സര്വ്വീസില് നിന്നും മാറ്റിനിര്ത്തപ്പെട്ട സുരേഷ് സസ്പെന്ഷന് കാലാവധി കഴിഞ്ഞി തിരിച്ചെത്തിയിട്ടും നിയമനം നല്കിയിരുന്നില്ല. ഇദ്ദേഹത്തെ വീണ്ടും സസ്പെന്റ് ചെയ്യാന് ശ്രമം നടന്നിരുന്നുവെങ്കിലും ചീഫ് സെക്രട്ടറിയുടെ ഇടപെടല് കാരണം അത് ഒഴിവാകുകയായിരുന്നു.
ഇതിനിടെ സുരേഷിനെ തിരികെ നിയമിക്കാത്തതില് വിശദീകരണം നല്കാന് ഹൈക്കോടതി സര്ക്കാറിന് നിര്ദ്ദേശം നല്കുകയും ചെയ്തിരുന്നു. അച്ചടക്കനടപടിയ്ക്കെതിരെ സുരേഷ് നല്കിയ ഹര്ജിയില് ഹൈക്കോടതിയില് വാദം തുടരുകയാണ്.
നവംബര് 21വരെ അദ്ദേഹം അവധിക്ക് അപേക്ഷ നല്കിയിട്ടുണ്ട്. അവധികഴിഞ്ഞെത്തുമ്പോള് എവിടെ നിയമിക്കണമെന്നകാര്യത്തില് മന്ത്രിസഭയ്ക്ക് തീരുമാനമെടുക്കാന് കഴിഞ്ഞിരുന്നില്ല. ഒടുവില് മുഖ്യമന്ത്രിയുടെതന്നെ കീഴിലുള്ള ഭരണപരിഷ്കരണവകുപ്പില് നിയമിക്കാന് തീരുമാനിക്കുകയായിരുന്നു.