പീഡനം: യുവാവിന്‌ 17വര്‍ഷം തടവ്‌

കോട്ടയം: പതിനഞ്ചുകാരിയെ വിവാഹവാഗ്‌ദാനം നല്‍കി പീഡിപ്പിച്ച കേസില്‍ യുവാവിന്‌ 17 വര്‍ഷം കഠിനതടവും ഒരു ലക്ഷം രൂപ പിഴയും. ആര്‍പ്പൂക്കര ഉണ്ണിബസാര്‍ ഭാഗത്ത്‌ കുത്തുകല്ലുങ്കല്‍ അരുണിനാണ്‌(26) കോട്ടയം അതിവേഗ കോടതി ശിക്ഷി വിധിച്ചത്‌.

പിഴ സംഖ്യയില്‍ 50,000 രൂപ പെണ്‍കുട്ടിക്ക്‌ നല്‍കണമെന്ന്‌ ഉത്തരവില്‍ നിര്‍ദ്ദേശമുണ്ട്‌. വിവിധ വകുപ്പുകള്‍ പ്രകാരമാണ്‌ കോടതി ശിക്ഷ വിധിച്ചത്‌. ശിക്ഷ ഒരുമിച്ച്‌ അനുഭവിച്ചാല്‍ മതിയാകും. പിഴയടച്ചില്ലെങ്കില്‍ ഒരു വര്‍ഷം അധികം തടവില്‍ക്കിടക്കണം.

പരാതിക്കാരി ഗാന്ധി നഗര്‍ സ്വദേശിയാണ്‌. വീട്ടില്‍ ആരുമില്ലാത്ത സമയത്ത്‌ രണ്ടുദിവസം പ്രതി അതിക്രമിച്ച്‌ കയറി ബലമായി പീഡിപ്പിച്ചുവെന്നാണ്‌ പ്രോസിക്യൂഷന്‍ കേസ്‌. പെണ്‍കുട്ടി പത്താംക്ലാസില്‍ പഠിക്കുമ്പോള്‍ മുതല്‍ പ്രതി ശല്യം ചെയ്യുകയാണത്രേ.

2007 മെയ്‌ 22നും ആഗസ്‌റ്റ്‌ 14നുമായിരുന്നു സംഭവം നടന്നത്‌. സെപ്‌റ്റംബര്‍ 8ന്‌ ഭീഷണിപ്പെടുത്തി മെഡിക്കല്‍ കോളെജ്‌ പരിസരത്തുള്ള വീട്ടില്‍ കൊണ്ടുപോയി പീഡിപ്പിച്ചെന്നും ആരോപണമുണ്ട്‌.

കേസ്‌ നല്‍കിയതിന്റെ പേരില്‍ കുട്ടിയുടെ വീട്ടില്‍ രാത്രി അതിക്രമിച്ച്‌ കയറി മാതാപിതാക്കളെ ഉപദ്രവിച്ചതിനും കേസ്‌ വിചാരണക്കിടെ പെണ്‍കുട്ടിയെ ഭീഷണിപ്പെടുത്തിയതിനും പ്രതിയുടെ പേരില്‍ പൊലീസ്‌ കേസ്‌ എടുത്തിട്ടുണ്ട്‌. ഈ കേസുകള്‍ ഏറ്റുമാനൂര്‍ ജുഡീഷ്യല്‍ ഫസ്റ്റ്‌ക്ലാസ്‌ മജിസ്‌ട്രേട്ട്‌ കോടതിയുടെ പരിഗണനയിലാണ്‌.