മൂലത്തറ: ഒഴുക്കില്‍പ്പെട്ട് ഒരാള്‍ മരിച്ചു

ചിറ്റൂര്‍: മൂലത്തറ റെഗുലേറ്റര്‍ തകര്‍ന്നുണ്ടായ ഒഴുക്കില്‍പ്പെട്ട് മരിച്ചയാളുടെ മൃതദേഹം കണ്ടെത്തി. പാലക്കാട് കോട്ടായി സ്വദേശി വേലായുധന്‍ (62) ആണ് മരിച്ചത്. വേലായുധന്റെ മൃതദേഹം തിങ്കളാഴ്ച രാവിലെ ആറരയോടെയാണു കണ്ടെത്തിയത്.

മുട്ടിക്കടവിനടുത്ത് വെള്ളം ഒഴുകുന്നത് കാണാനായി നില്‍ക്കുന്നതിനിടെ ഞായറാഴ്ച പാലം തകര്‍ന്ന് ഇയാളെ കാണാതാവുകയായിരുന്നു. പാലത്തിലുണ്ടായിരുന്ന ഇരുപതോളം പേര്‍ രക്ഷപ്പെട്ടെങ്കിലും വേലായുധനെ കാണാതായത് അറിഞ്ഞിരുന്നില്ല.

ഞായറാഴ്ചയാണ് തമിഴ്‌നാട്ടിലെ ആളിയാര്‍ ഡാം തുറന്നു വിട്ടതിനെത്തുടര്‍ന്നുണ്ടായ മലവെള്ളപ്പാച്ചിലില്‍ മൂലത്തറ ഡാമിന്റെ വശങ്ങള്‍ തകര്‍ന്നത്. ശക്തിയായ ഒഴുക്കിനെ തുടര്‍ന്ന് ബണ്ടിനിരുവശങ്ങളിലും മണ്ണ് ഒലിച്ചു പോയി. ചിറ്റൂര്‍ പുഴയുടെയും ഭാരത പുഴയുടെയും കരകളില്‍ വെള്ളം കയറി. ഒട്ടേറെ വീടുകള്‍ വെള്ളത്തിനടിയിലാകുകയും വന്‍ തോതില്‍ കൃഷി നശിക്കുകയും ചെയ്തു.

ഞായറാഴ്ച പുലര്‍ച്ചെ അഞ്ചു മണിയോടെയാണു ആളിയാര്‍ ഡാം തുറന്നു വിട്ടത്. തമിഴ്‌നാട്ടില്‍ ഏതാനും ദിവസമായി തുടരുന്ന കനത്ത മഴയില്‍ ആളിയാര്‍ ഡാമില്‍ ജലനിരപ്പുയര്‍ന്നിരുന്നു. അണക്കെട്ടില്‍ ക്രമാതീതമായി വെള്ളം നിറഞ്ഞതോടെയാണ് തുറന്നുവിട്ടതെന്നാണു തമിഴ്‌നാടിന്റെ വിശദീകരണം.