സഭയോട് മാപ്പു പറയാം അസ്മിയോടില്ല

മുംബൈ: മഹാരാഷ്ട്ര നിയമസഭയില്‍ ഉണ്ടായ കൈയ്യാങ്കളിയില്‍ സഭയോട് മാപ്പു പറയാന്‍ തയാറാണെന്ന് മഹാരാഷ്ട്ര നവനിര്‍മാണ്‍ സേന എംഎല്‍എമാര്‍. സഭാ സമ്മേളനത്തിന്റെ ആദ്യദിനത്തില്‍ സമാജ് വാദി പാര്‍ട്ടി എംഎല്‍എ അബു അസ്മി ഹിന്ദിയില്‍ സത്യപ്രതിജ്ഞ ചെയ്തതില്‍ കുപിതരായ എംഎന്‍എസ് എംഎല്‍എമാരാണ് അസ്മിയെ കൈയ്യേറ്റം ചെയ്തത്.

അംഗങ്ങളെല്ലാവരും മറാത്തിയില്‍ തന്നെ സത്യപ്രതിജ്ഞ ചെയ്യണമെന്നായിരുന്നു എംഎന്‍എസിന്റെ ആവശ്യം. ഇതേ തുടര്‍ന്ന് എംഎന്‍എസിന്റെ നാല് എംഎല്‍എമാരെ നാല് വര്‍ഷത്തേക്ക് സസ്‌പെന്റ് ചെയ്തിരുന്നു.

അബു അസ്മിയോട് മാപ്പ് പറയില്ല, എന്നാല്‍ സഭയ്ക്കകത്ത് നടന്ന സംഭവത്തില്‍ സഭാ അധ്യക്ഷനായ സ്പീക്കറോട് മാപ്പു പറയുമെന്നും എംഎന്‍എസ് വക്താക്കള്‍ പറഞ്ഞു. പ്രശ്‌നം ഗുരുതരമാകുമെന്ന് കണ്ട് എംഎല്‍എമാരോട് മാപ്പു പറായന്‍ എംഎന്‍എസ് തലവന്‍ രാജ് താക്കറെ ആവശ്യപ്പെട്ടുവെന്നാണ് റിപ്പോര്‍ട്ടുകള്‍.