കോണ്ഗ്രസ് പ്രവേശനം: മുരളി കത്ത് നല്കി
കോണ്ഗ്രസ്സില് തിരിച്ചെത്തിയാല് ഗ്രൂപ്പ് കളിക്കില്ലെന്നും പാര്ട്ടി ശക്തിപ്പെടുത്താന് ശ്രമിക്കുമെന്നും മുരളീധരന് കത്തില് വ്യക്തമാക്കിയിട്ടുണ്ട്.
മുന്കാലങ്ങളില് തന്റെ ഭാഗത്തുനിന്നുണ്ടായ ദൗര്ഭാഗ്യകരമായ നടപടികളില് അദ്ദേഹം ഖേദം പ്രകടിപ്പിച്ചിട്ടുണ്ട്. കേരളത്തിന്റെ ചുമതലയുള്ള എഐസിസി ജനറല് സെക്രട്ടറി മൊഹ്സിന കിദ്വായിയുടെ വീട്ടിലെത്തിയാണ് വ്യാഴാഴ്ച വൈകിട്ട് അദ്ദേഹം അപേക്ഷ കൈമാറിയത്.
കോണ്ഗ്രസ് അധ്യക്ഷ സോണിയാഗാന്ധിക്കുള്ളതാണ് അപേക്ഷ. തന്േറത് 'നിരുപാധിക മാപ്പപേക്ഷ'യാണെന്ന് കത്ത് സമര്പ്പിച്ചശേഷം മുരളീധന് പറഞ്ഞു.
കോണ്ഗ്രസ്സില് പ്രവര്ത്തിക്കാന് അവസരം നല്കണമെന്നും തന്നോടൊപ്പം തിരിച്ചുവരുന്ന പ്രവര്ത്തകരെ പാര്ട്ടിയിലെടുക്കണമെന്നും അപേക്ഷയില് അഭ്യര്ഥിച്ചിട്ടുണ്ട്.
അപേക്ഷ കോണ്ഗ്രസ് അധ്യക്ഷയ്ക്ക് സമര്പ്പിക്കുമെന്നും അവരുമായി ചര്ച്ച നടത്തിയശേഷം അഭിപ്രായം അറിയിക്കാമെന്നും മൊഹ്സിന പറഞ്ഞതായി മുരളീധരന് വെളിപ്പെടുത്തി. മുരളീധരനും മൊഹ്സിനയും തമ്മിലുള്ള കൂടിക്കാഴ്ച 40 മിനിറ്റോളം നീണ്ടു.
അപേക്ഷയുടെ പകര്പ്പ് എഐസിസി അച്ചടക്കസമിതി അധ്യക്ഷന്കൂടിയായ പ്രതിരോധമന്ത്രി എ.കെ. ആന്റണിക്ക് നല്കുമെന്ന് മുരളീധരന് പറഞ്ഞു.
കേന്ദ്ര പ്രവാസികാര്യമന്ത്രി വയലാര് രവിയെയും അദ്ദേഹം സന്ദര്ശിച്ച് ചര്ച്ച നടത്തിയിട്ടുണ്ട്. കെപിസിസി പ്രസിഡന്റ് രമേശ് ചെന്നിത്തല, പ്രതിപക്ഷ നേതാവ് ഉമ്മന്ചാണ്ടി, യുഡിഎഫ് കണ്വീനര് പി.പി തങ്കച്ചന് എന്നിവരുമായി സംസാരിച്ചശേഷമാണ് താന് ഹൈക്കമാന്ഡിന് അപേക്ഷ നല്കിയതെന്ന് മുരളീധരന് വെളിപ്പെടുത്തി.