സഹോദരിമാരുടെ കൊല 2 പേര്‍ പിടിയില്‍

തൃശൂര്‍: ചേറൂരില്‍ വൃദ്ധ സഹോദരിമാരെ കൊലപ്പെടുത്തിയ കേസില്‍ തമിഴ്‌നാട്ടില്‍ നിന്നുള്ള തൊഴിലാളികളായ മുരുകേശന്‍, ശെല്‍വരാജന്‍ എന്നിവര്‍ അറസ്റ്റില്‍. കൊല്ലപ്പെട്ട സ്ത്രീകളുടെ വീട്ടില്‍ നിന്നും മോഷണം പോയ സ്വര്‍ണാഭരണങ്ങള്‍ ഇവരില്‍ നിന്നും കണ്ടെടുത്തു. നേരത്തെ തന്നെ കസ്റ്റഡിയിലായ ഇവരുടെ അറസ്റ്റ് ശനിയാഴ്ചയാണ് രേഖപ്പെടുത്തിയത്.

ഒരാളെ കേരളത്തില്‍ നിന്നും ഒരാളെ തമിഴ്‌നാട്ടിലെ ദിണ്ടിഗലില്‍ നിന്നുമാണ് കസ്റ്റഡിയില്‍ എടുത്തത്. കൊല്ലപ്പെട്ട വിശാലാക്ഷി(70)യുമായും സരസ്വതി(68)യുമായും കൂലി സംബന്ധിച്ച് ഇവര്‍ വഴക്കുണ്ടാക്കിയിരുന്നു. ഇതാണ് കൊലപാതകത്തിന് പ്രേരിപ്പിച്ചത്.

തളപ്പ് ഉപയോഗിച്ചാണ് ഇവര്‍ വൃദ്ധസഹോദരിമാരെ കൊലപ്പെടുത്തിയത്. തളപ്പ് സമീപത്തെ കിണറ്റില്‍ ഉപേക്ഷിച്ചതായി ഇവര്‍ പൊലീസിനു മൊഴി നല്‍കി. ഇക്കാര്യം പൊലീസ് സ്ഥിരീകരിച്ചിട്ടുണ്ട്. വിശാലാക്ഷി, സഹോദരി സരസ്വതി എന്നിവര്‍ തലയ്ക്കടിയേറ്റ് മരിച്ച നിലയില്‍ കഴിഞ്ഞ ബുധനാഴ്ചയാണ് കണ്ടെത്തിയത്.