നമ്പര്‍ പോര്‍ട്ടബിലിറ്റി: 19രൂപയില്‍ കൂടരുത്

മുംബൈ: ഉപയോഗിച്ചുകൊണ്ടിരിക്കുന്ന മൊബൈല്‍ നമ്പര്‍ നിലനിര്‍ത്തിക്കൊണ്ട് സേവനദാതാവിനെ മാറ്റാനുള്ള(നമ്പര്‍ പോര്‍ട്ടബിലിറ്റി) അവസരം ജനുവരി മുതല്‍ ഇന്ത്യയില്‍ നടപ്പിലാകും.

ഈ സൗകര്യമൊരുക്കുന്നതിനായി ഉപഭോക്താക്കളില്‍ നിന്നും 19 രൂപയില്‍ക്കൂടുതല്‍ ചാര്‍ജ് ഈടാക്കരുതെന്ന് ടെലികോം റെഗുലേറ്ററി അതോറിറ്റി മൊബൈല്‍ സേവനദാതാക്കള്‍ക്ക് നിര്‍ദ്ദേശം നല്‍കി. 19രൂപയില്‍ കുറവ് ഈടാക്കാന്‍ കമ്പനികള്‍ക്ക് അവകാശമുണ്ട്.

ചില സംസ്ഥാനങ്ങളില്‍ ഡിസംബര്‍ അവസാനം മുതല്‍തന്നെ നമ്പര്‍ പോര്‍ട്ടബിലിറ്റി നിലവില്‍വരും. മാര്‍ച്ച് മാസത്തോടെ രാജ്യം മുഴുവന്‍ ഈ സൗകര്യം ലഭ്യമാക്കാന്‍ കഴിയുമെന്നാണ് പ്രതീക്ഷിക്കപ്പെടുന്നത്.

ഒക്ടോബര്‍ മുതല്‍ ഈ സൗകര്യം കൊണ്ടുവരാനാണ് ആദ്യം തീരുമാനിച്ചിരുന്നതെങ്കിലും അത് നീണ്ടുപോവുകയായിരുന്നു. ട്രായ് മാര്‍ഗനിര്‍ദ്ദേശ പ്രകാരം മൊബൈല്‍ സേവനദാതാവിനെ മാറ്റുന്ന പ്രക്രിയ പരമാവധി നാലു ദിവസത്തിനുള്ളില്‍ പൂര്‍ത്തിയായിരിക്കണം.

ഇന്ത്യയിലെ മൊബൈല്‍ ഉപയോക്താക്കളില്‍ 2മുതല്‍ 3ശതമാനംവരെ ആളുകള്‍ നമ്പര്‍ പോര്‍ട്ടബിലിറ്റി സൗകര്യം ആഗ്രഹിക്കുന്നവരാണെന്നാണ് കണക്കുകൂട്ടല്‍. അതുകൊണ്ടുതന്നെ ഇതിനായി പരമാവധി കുറഞ്ഞ ചാര്‍ജ് ഈടാക്കി ലാഭം നേടാനായി കമ്പനികള്‍ മത്സരിക്കുമെന്ന് ഉറപ്പാണ്.

ഇതിന്റെ ഫലമായി മൊബൈല്‍ കോള്‍ നിരക്കുകള്‍ ഇനിയും കുറയാന്‍ സാധ്യതയുണ്ട്. സിഡിഎംഎയില്‍ നിന്നും ജിഎസ്എം സാങ്കേതിക വിദ്യയിലേക്ക് മാറാനും ഉപയോക്താക്കള്‍ക്ക് തടസ്സമുണ്ടാകില്ല. എന്നാല്‍ ബന്ധപ്പെട്ട കമ്പനിക്ക് പ്രസ്തുത സര്‍ക്കിളില്‍ ലൈസന്‍സ് ഉണ്ടായിരിക്കണമെന്നുമാത്രം.