പച്ചക്കറികിറ്റും ന്യായവില ഹോട്ടലും ഏര്‍പ്പെടുത്തും

തിരുവനന്തപുരം: ഭക്ഷ്യവസ്തുക്കള്‍ നേരിട്ട് ശേഖരിച്ച് വിതരണം ചെയ്യുന്നതിന് സിവില്‍ സപ്ലൈസ് കോര്‍പ്പറേഷന് അടിയന്തരമായി 55 കോടി രൂപ അനുവദിയ്ക്കാന്‍ തീരുമാനിച്ചതായി മുഖ്യമന്ത്രി വിഎസ് അച്യുതാനന്ദന്‍. വിലക്കയറ്റം നിയന്ത്രിയ്ക്കുന്നതിനായി പച്ചക്കറി കിറ്റ് സബ്‌സിഡിയോടെ നല്‍കും. പട്ടണങ്ങളില്‍ ന്യായവില ഹോട്ടലുകള്‍ തുടങ്ങും. മാവേലി സ്‌റ്റോറുകളുടെ കടം തീര്‍ക്കുമെന്നും മുഖ്യമന്ത്രി അറിയിച്ചു. സംസ്ഥാനത്ത് വിലക്കയറ്റം രൂക്ഷമായ സാഹചര്യത്തില്‍ വിളിച്ചു ചേര്‍ത്ത ഉന്നതതല യോഗത്തിന് ശേഷം സംസാരിയ്ക്കുകയായിരുന്നു അദ്ദേഹം.

പച്ചക്കറി കിറ്റുകള്‍ക്ക് 10 മുതല്‍ 30 ശതമാനം വരെ സബ്‌സിഡി നല്‍കുന്നതിനാണ് സര്‍ക്കാര്‍ ആലോചിയ്ക്കുന്നത്. ഭക്ഷ്യവസ്തുക്കളുടെ പൂഴ്ത്തിവെയ്പ്പ് തടയുന്നതിനായി അടിയന്തര നടപടി സ്വീകരിയ്ക്കുന്നതിനായി കളക്ടര്‍മാര്‍ക്ക് നിര്‍ദ്ദേശം നല്‍കിയിട്ടുണ്ട്.

വന്‍കിട കുത്തകകള്‍ ഭക്ഷ്യോല്‍പന്നങ്ങളുടെ വില നിയന്ത്രിക്കുകയാണെന്ന് മുഖമന്ത്രി കുറ്റപ്പെടുത്തി. സംസ്ഥാനത്തിന് അര്‍ഹമായ വിഹിതം കേന്ദ്രം നല്‍കുന്നില്ല. കുത്തകകളെ സഹായിക്കുന്ന നിലപാടാണ് കേന്ദ്രം സ്വീകരിക്കുന്നത്.

ഭക്ഷ്യമന്ത്രി സി.ദിവാകരന്‍, ആഭ്യന്തരമന്ത്രി കോടിയേരി ബാലകൃഷ്ണന്‍, സഹകരണമന്ത്രി ജി സുധാകരന്‍ തുടങ്ങിയവരും ചീഫ് സെക്രട്ടറി നീലാ ഗംഗാധരന്‍ അടക്കമുള്ള ഉന്നത ഉദ്യോഗസ്ഥരും യോഗത്തില്‍ പങ്കെടുത്തു.