പാക് -ചൈന കൂട്ടുകെട്ട് ഭീഷണി: ആന്റണി

ദില്ലി: സൈനിക സഹകരണം ഉള്‍പ്പെടെ ചൈനയും പാകിസ്താനും തമ്മിലുള്ള കൂട്ടുകെട്ട് ഇന്ത്യയ്ക്ക് ആശങ്കയുണര്‍ത്തുന്നതാണെന്ന് പ്രതിരോധ മന്ത്രി എകെ ആന്റണി. ഈ സൈനിക സഹകരണം ഇന്ത്യയ്ക്ക് കടുത്ത സുരക്ഷാ ഭീഷണിയാണ് ഉയര്‍ത്തുന്നതെന്നും പ്രതിരോധ ഗവേഷണ കേന്ദ്രത്തിന്റെ സ്ഥാപക ദിനത്തോടനുബന്ധിച്ച യോഗത്തെ അഭിസംബോധന ചെയ്യവെ ആന്റണി വ്യക്തമാക്കി.

പാക് അധിനിവേശ കാശ്മീരില്‍ ചൈന നിരന്തരം നിര്‍മ്മാണ പ്രവര്‍ത്തനങ്ങള്‍ നടത്തിവരുകയാണ്.ഭീകരരെ അമര്‍ച്ച ചെയ്യുന്ന കാര്യത്തില്‍ പാക്കിസ്ഥാന് ആത്മാര്‍ത്ഥതയില്ലെന്ന് ആന്റണി ആവര്‍ത്തിച്ചു. അവിടെ ഭീകരര്‍ക്കുള്ള സൗകര്യങ്ങള്‍ കുറയുകയല്ല മറിച്ച് വര്‍ധിക്കുകയാണ്. പാക്കിസ്ഥാനിലെ പല പ്രവിശ്യകളിലും തീവ്രവാദികളുടെ പ്രവര്‍ത്തനം ശക്തമാണ്.

പ്രധാനമന്ത്രി മുന്‍കൈയ്യെടുത്ത് പല നീക്കങ്ങളും നടത്തിയെങ്കിലും ഇത് അവസാനിപ്പിയ്ക്കുന്ന കാര്യത്തില്‍ പാക്കിസ്ഥാന് ആത്മാര്‍ത്ഥതയില്ലെന്നും ആന്റണി കുറ്റപ്പെടുത്തി. പാക്കിസ്ഥാനിലെ സംഭവങ്ങള്‍ സൂക്ഷ്്മമായി നിരീക്ഷിച്ചുവരുകയാണെന്നും അദ്ദേഹം പറഞ്ഞു.