യുനീക് ഐഡി പൗരത്വത്തിന്റെ തെളിവല്ല: നിലേകനി

മുംബൈ: യുനീക് ഐഡന്റിഫിക്കേഷന്‍ നമ്പര്‍ അതോറിറ്റി പദ്ധതിയുടെ കീഴില്‍ എല്ലാ ഇന്ത്യന്‍ പൌരന്മാര്‍ക്കും നല്‍കാന്‍ പോകുന്ന യുണീക് ഐഡിയെ പൌരത്വത്തിന് തെളിവായി കാണരുതെന്ന് പദ്ധതിയുടെ അധ്യക്ഷന്‍ നന്ദന്‍ നിലേകനി.

ഇത് വ്യക്തിയെ തിരിച്ചറിയാന്‍ വേണ്ടി മാത്രമുള്ളതാണ് . മഹാരാഷ്ട്ര സര്‍ക്കാരിന്റെ ഉന്നത ഉദ്യോഗസ്ഥരുമായി യുനീക് ഐഡിയെ പറ്റി വിശദീകരിക്കെയാണ് നന്ദന്‍ നിലേകാനി ഇക്കാര്യം വ്യക്തമാക്കിയത്.

അടുത്ത 12 - 18 മാസങ്ങള്‍ക്കുള്ളില്‍ രാജ്യത്തെ 60 കോടിയെങ്കിലും വരുന്ന ആളുകള്‍ക്ക് യുനീക് ഐഡി നല്‍കാനാകുമെന്ന് നിലേകനി പറഞ്ഞു. രാജ്യത്തെ ബാങ്കുകള്‍, തെരഞ്ഞെടുപ്പ് കമ്മീഷന്‍, സംസ്ഥാന സര്‍ക്കാരുകള്‍, മറ്റ് സ്ഥാപനങ്ങള്‍ എന്നിവിടങ്ങളില്‍ നിന്നുള്ള ഡാറ്റയുടെ അടിസ്ഥാനത്തിലാണ് ഐഡി നല്‍കുക.

ഐടി വ്യവസായ മേഖലയില്‍ ഒരു നിര്‍ണായക ശക്തിയായതിനാല്‍ മഹാരാഷ്ട്ര സംസ്ഥാനത്തിന് യുനീക് ഐഡി പദ്ധതി അതിവേഗം നടപ്പാക്കാന്‍ കഴിയുമെന്ന് പ്രതീക്ഷിക്കുന്നു-നന്ദന്‍ നിലേകനി പറഞ്ഞു.

മഹാരാഷ്ട്രയിലെ ജനങ്ങള്‍ക്ക് യുനീക് ഐഡി നല്‍കുന്നതിനെ പറ്റി സംസ്ഥാന ചീഫ് സെക്രട്ടറി ജോണി ജോസഫ് അടക്കമുള്ള ഉന്നത ഉദ്യോഗസ്ഥരുമൊത്ത് നിലേകനി വെള്ളിയാഴ്ച ചര്‍ച്ച നടത്തി.

രാജ്യത്തെ ഓരോ പൌരനും ഒരു പ്രത്യേക നമ്പര്‍ അനുവദിക്കുന്ന ഈ പദ്ധതി ഫെബ്രുവരിയിലാണ് തുടങ്ങിവച്ചത്. അടുത്ത വര്‍ഷമാദ്യത്തോടെ ഐഡി കാര്‍ഡുകള്‍ വിതരണം ചെയ്ത് തുടങ്ങുമെന്ന് അറിയുന്നു. വ്യക്തിയുടെ പേര്, വിലാസം, കുടുംബ വിവരങ്ങള്‍, വിരലടയാളം എന്നിവയാണ് കാര്‍ഡില്‍ ഉണ്ടാവുക.