നസീറിനെ ഈ മാസം ഏഴിന് ഹാജരാക്കണം

കണ്ണൂര്‍: മേഘാലയില്‍ അറസ്റ്റിലായ ലക്ഷ്‌ക്കര്‍ ഇ തൊയ്ബ പ്രവര്‍ത്തകന്‍ തടിയന്റവിട നസീറിനെ ഈ മാസം ഏഴിന് ഹാജരാക്കണമെന്ന് കണ്ണൂര്‍ ഒന്നാം ക്ലാസ് മജിസ്‌ട്രേറ്റ് കോടതി ഉത്തരവിട്ടു. നസീറിനെ വിട്ടുകിട്ടുന്നതിന് വേണ്ടി കേരള പൊലീസ് നല്‍കിയ ഹര്‍ജിയിന്‍മേലാണ് ഹര്‍ജിയന്‍മേലാണ് കോടതി പ്രൊഡക്ഷന്‍ വാറന്റ് പുറപ്പെടുവിച്ചത്.

അതിനിടെ നസീറിനെ ഷില്ലോംങ് ചീഫ് ജുഡീഷ്യല്‍ മജിസ്‌ട്രേറ്റ് കോടതി ഒരു ദിവസത്തേക്ക് റിമാന്‍ഡ് ചെയ്തു. വെള്ളിയാഴ്ച ബാംഗ്ലൂര്‍ പൊലീസിന് നസീറിനെ കൈമാറുമെന്നാണ് അറിയുന്നത്. നസീറിനെ കേരളത്തിന് വിട്ടുകിട്ടുന്നതിന്റെ ആവശ്യത്തിനായി ഉടന്‍ തന്നെ ഐജി ടോമിന്‍ തച്ചങ്കരി ബാംഗ്ലൂര്‍ക്ക് പോകും.

നസീറിന് കേരളത്തിലെ തീവ്രവാദ പ്രവര്‍ത്തനങ്ങളിലും സ്‌ഫോടനങ്ങളിലും കാര്യമായ പങ്കുണ്ടെന്ന് പൊലീസും തീവ്രവാദകേസുകള്‍ അന്വേഷിക്കുന്ന പ്രത്യേക സംഘത്തിനും സൂചനകള്‍ ലഭിച്ചിട്ടുണ്ട്. ഈ സാഹചര്യത്തില്‍ നസീറിനെ കണ്ണൂരിലെത്തിച്ച് ചോദ്യം ചെയ്യേണ്ടതുണ്ടെന്ന് കേരള പോലീസ് നല്‍കിയ ഹര്‍ജിയില്‍ ചൂണ്ടിക്കാണിച്ചിരുന്നു.

തീവ്രവാദം സംബന്ധിച്ച കേസ് വിചാരണ തലശ്ശേരി കോടതിയില്‍ അടുത്തമാസം ആരംഭിയ്ക്കാനിരിയ്‌ക്കെയാണ് നസീര്‍ പിടിയിലായിട്ടുള്ളത. നസീറിന്റെ അറസ്റ്റ് കേസിലെ പ്രധാന വഴിത്തിരിവാകുമെന്നാണ് കരുതപ്പെടുന്നത്. എടക്കാട് പോലീസ് രജിസ്റ്റര്‍ ചെയ്ത കേസില്‍ മൂന്നാംപ്രതിയും കളമശ്ശേരി ബസ് കത്തിക്കല്‍ കേസില്‍ ഒന്നാംപ്രതിയുമായ നസീര്‍ കുറഞ്ഞത് നാല് കേസുകളിലെങ്കിലും പ്രധാന പ്രതിയാകുമെന്നാണ് റിപ്പോര്‍ട്ടുകള്‍.