കോടതി കയറിയ ഓര്ക്കുട്ട് സൗഹൃദം
യുവാവിന്റെ അവകാശവാദങ്ങള് തള്ളി യുവതി ഭര്ത്താവിനും മാതാപിതാക്കള്ക്കും ഒപ്പം മടങ്ങി. ആലപ്പുഴ സ്വദേശിനിയായ യുവതിയെ അനധികൃതമായി വീട്ടു തടങ്കലില് വച്ചിരിക്കുകയാണെന്ന് കാണിച്ച് തിരുവനന്തപുരം സ്വദേശിയായ യുവാവ് ഹേബിയസ് കോര്പ്പസ് ഹര്ജി നല്കുകയായിരുന്നു.
ചാറ്റിങ്ങിനിടെ പരിചയപ്പെട്ട യുവതിയുമായി വിവാഹം കഴിക്കാന് ചാല സബ് രജിസ്ട്രാര് ഓഫീസില് നവംബര് അഞ്ചിന് നോട്ടീസ് നല്കിയിരുന്നുവെന്നും ഈ വിവാഹം മുടക്കാന് വീട്ടുകാര് യുവതിയെ തടഞ്ഞുവച്ചിരിക്കുകയാണെന്നുമായിരുന്നു പരാതി.
യുവതി ഭര്ത്താവിനൊപ്പമാണ് കോടതിയിലെത്തിയത്. ഇന്റര്നെറ്റിലൂടെ പരിചയപ്പെട്ട യുവാവിനോട് നേരിട്ട് സംസാരിക്കാന് പോലും തനിക്ക് താല്പര്യമില്ലെന്നായിരുന്നു കോടതിയില് യുവതിയുടെ പ്രതികരണം. ചില രേഖകളില് ഒപ്പിട്ടിരുന്നുവെങ്കിലും വിവാഹം ചെയ്യാന് ഉദ്ദേശിച്ചിരുന്നില്ലെന്ന് യുവതി പറഞ്ഞു.
നവംബര് 28നാണ് യുവതിയുടെ വിവാഹം കഴിഞ്ഞത്. ഈ വിവാഹത്തിനുള്ള എല്ലാ ഒരുക്കങ്ങളും പൂര്ത്തിയായശേഷമാണ് തിരുവനന്തപുരം സ്വദേശിയില് നിന്നുള്ള നോട്ടീസ് കിട്ടിയതെന്നും യുവതി കോടതിയെ അറിയിച്ചു.
അഞ്ചുവര്ഷമായി തനിക്ക് അടുത്തറിയാവുന്ന നാട്ടുകാരനും അയല്വാസിയുമായ യുവാവിനെയാണ് യുവതി വിവാഹംചെയ്തിരിക്കുന്നത്. ഇക്കാര്യങ്ങള് പരിഗണിച്ച് കോടതി യുവതിയെ ഭര്ത്താവിനും വീട്ടുകാര്ക്കുമൊപ്പം വിടുകയായിരുന്നു.