കുമളിയില്‍ ഹര്‍ത്താല്‍

കുമളി: 46 പേര്‍ മരിച്ച തേക്കടി ബോട്ട് ദുരന്തത്തെ തുടര്‍ന്ന് തേക്കടി തടാകത്തില്‍ നിര്‍ത്തി വെച്ചിരിക്കുന്ന ബോട്ടിങ് പുനരാരംഭിക്കണമെന്ന് ആവശ്യപ്പെട്ട് ശനിയാഴ്ച കുമളയില്‍ ഹര്‍ത്താല്‍ ആചരിയ്ക്കുന്നു.

കുമളി പൗരസമിതിയുടെ നേതൃത്വത്തിലാണ് ഹര്‍ത്താലിന് ആഹ്വാനം ചെയ്തിരിയ്ക്കുന്നത്. രാവിലെ ആറു മുതല്‍ ഉച്ചതിരിഞ്ഞ് രണ്ട് മണി വരെയാണ് ഹര്‍ത്താല്‍.

ഹര്‍ത്താലില്‍ നിന്ന് അത്യാവശ്യ സര്‍വീസുകളെയും ശബരിമല തീര്‍ത്ഥാടകരെയും ഒഴിവാക്കിയതായി പൗരസമിതി വക്താക്കള്‍ അറിയിച്ചു. തേക്കടിയിലെ ബോട്ട് സര്‍വീസ് സ്തംഭിച്ചത് പ്രദേശത്തെ ടൂറിസം മേഖലയെ തളര്‍ത്തിയിരുന്നു. ടൂറിസത്തിലൂടെ ഉപജീവനം കണ്ടെത്തുന്ന നൂറ് കണക്കിന് പേരെയാണ് ഇത് കാര്യമായി ബാധിച്ചത്.