അശ്ലീലം കണ്ടെത്തിയാല്‍ സമ്മാനം

ബെയ്ജിങ്: ഇന്റര്‍നെറ്റില്‍ പ്രചരിക്കുന്ന അശ്ലീലങ്ങള്‍ കണ്ടെത്തി റിപ്പോര്‍ട്ട് ചെയ്യുന്ന ഉപയോക്താക്കള്‍ക്ക് സമ്മാനം.

ചൈനീസ് സര്‍ക്കാറാണ് ഇന്റര്‍നെറ്റിലെ അശ്ലീലം കണ്ടെത്തി നല്‍കുന്നവര്‍ക്ക് സമ്മാനം പ്രഖ്യാപിച്ചിരിക്കുന്നത്. ചൈന കേന്ദ്രമായി പ്രവര്‍ത്തിക്കുന്ന സൈറ്റുകളിലുള്ള അശ്ലീലം കണ്ടെത്തി അറിയിക്കുന്നവര്‍ക്കാണ് സമ്മാനം ലഭിക്കുക.

പതിനായിരം യുവാന്‍(1,465ഡോളര്‍)ആണ് സമ്മാനത്തുക. ചൈനീസ് ഇന്റര്‍നെറ്റ് ശൃംഗലയില്‍ നിന്നും അശ്ലീലമുള്ള ഉള്ളടക്കങ്ങള്‍ പൂര്‍ണമായി നീക്കം ചെയ്യുന്നതിന്റെ അവസാനഘട്ട കാംപെയിന്റെ ഭാഗമായിട്ടാണ് സര്‍ക്കാര്‍ ഈ പദ്ധതി പ്രഖ്യാപിച്ചിരിക്കുന്നത്.

ഈ കാംപെയിന്‍ കഴിഞ്ഞ വെള്ളിയാഴ്ചയാണ് ആരംഭിച്ചത്. മൊബൈല്‍ സൈറ്റുകളിലും മറ്റും വരുന്ന അശ്ലീല പരസ്യങ്ങളും ഇത്തരത്തില്‍ റിപ്പോര്‍ട്ട് ചെയ്യാം.

പദ്ധതി പ്രഖ്യാപിച്ച് കഴിഞ്ഞ് 24 മണിക്കൂറിനുള്ളലില്‍ അശ്ലീലം കണ്ടെത്തിയെന്ന് കാണിച്ച് അഞ്ഞൂറോളം ഫോണ്‍ വിളികളും പതിമൂന്നായിരത്തോളം ഓണ്‍ലൈന്‍ നിര്‍ദ്ദേശങ്ങളും ലഭിച്ചെന്ന് ബെയ്ജിങിലെ ഇന്റര്‍നെറ്റ് ഇല്ലീഗല്‍ ഇന്‍ഫര്‍മേഷന്‍ റിപ്പോര്‍ട്ടിങ് സെന്റര്‍ അധികൃതര്‍ വ്യക്തമാക്കി.

ഓരോ വെബ്‌സൈറ്റിലെയും അശ്ലീലങ്ങള്‍ സംബന്ധിച്ച് ആദ്യം റിപ്പോര്‍ട്ട് ചെയ്യുന്നവര്‍ക്ക് ആയിരം യുവാന്‍ മുതല്‍ പതിനായിരം യുവാന്‍ വരെ ലഭിയ്ക്കും.