മന്ത്രവാദം കുടുംബത്തിലെ 6 പേരെ കൊന്നു

ഗുവാഹാട്ടി: അസമില്‍ ഒരു കുടുംബത്തിലെ നാല് കുട്ടികള്‍ ഉള്‍പ്പെടെ ആറു പേരെ വെട്ടിക്കൊന്നു. ദുര്‍മന്ത്രവാദവുമായി ബന്ധപ്പെട്ടാണ് കൂട്ടക്കൊല അരങ്ങേറിയതെന്ന് സംശയിക്കുന്നു. ഗുവാഹാട്ടിയില്‍ നിന്ന് 30 കിലോമീറ്റര്‍ അകലെയുള്ള ജോഗ്‌ദോള്‍ ഗ്രാമത്തിലെ കൂലിപ്പണിക്കാരന്‍ ഹരാകണ്ട ദോലെ(50), ഭാര്യ, മൂന്ന് മക്കള്‍, ദോലെയുടെ സഹോദരന്റെ മകന്‍ എന്നിവരാണ് കൊല്ലപ്പെട്ടത്.

അമാവാസി ദിനമായ ഞായറാഴ്ച വൈകിട്ടാണ് കൊലനടന്നത്. കൊല്ലപ്പെട്ടവരില്‍ ആറുവയസ്സുള്ള രണ്ട് കുട്ടികളുടെ തലയില്ലാത്ത മൃതദേഹങ്ങളാണ് കണ്ടെത്തിയത്. മൃതദേഹങ്ങള്‍ കണ്ടെത്തിയ നാട്ടുകാരാണ് വിവരം പൊലീസിനെ അറിയിച്ചത്.

അമാവാസി ദിനത്തില്‍ മനുഷ്യബലി അസമില്‍ പലയിടത്തും ഇപ്പോഴും നടക്കുന്നുണ്ട്. കുട്ടികളുടെ തലയറുത്ത് കൊണ്ടു പോയത് മന്ത്രവാദത്തിന് വേണ്ടിയാണെന്നാണ് സംശയിക്കുന്നത്. തീര്‍ത്തും ദരിദ്രരരായ കുടുംബത്തോട് ഗ്രാമത്തിലെ ആര്‍ക്കും ശത്രുതയുണ്ടായിരുന്നില്ലെന്ന് ഗ്രാമത്തലവന്‍ പറഞ്ഞു. പൊലീസ് അന്വേഷണം തുടങ്ങിയിട്ടുണ്ട്.