ദിനകരന് സ്ഥാനക്കയറ്റമില്ല

ദില്ലി: കര്‍ണാടക ഹൈക്കോടതി ചീഫ് ജസ്റ്റിസ് പിഡി ദിനകരന് സുപ്രീംകോടതിയിലേക്ക് സ്ഥാനക്കയറ്റം നല്‍കാനുള്ള തീരുമാനം വേണ്ടെന്നുവെക്കാന്‍ തീരുമാനിച്ചു. ഏറെ നാള്‍ നീണ്ടുനിന്ന അനിശ്ചിതത്വത്തിന് വിരാമമിട്ടു കൊണ്ട് സുപ്രീം കോടതി കൊളീജിയമാണ് ഇക്കാര്യത്തില്‍ അന്തിമ തീരുമാനം കൈക്കൊണ്ടത്.

അനധികൃത ഭൂമി ഇടപാടുകേസില്‍ ആരോപണവിധേയനായ പശ്ചാത്തലത്തിലാണ് സുപ്രീംകോടതിയുടെ ഈ നടപടി. സ്ഥാനക്കയറ്റം നല്‍കാനുള്ള സുപ്രീംകോടതി കൊളീജിയത്തിന്റെ നിര്‍ദേശം നേരത്തെ കേന്ദ്രനിയമമന്ത്രാലയം തിരിച്ചയച്ചിരുന്നു. ഇതിനെ തുടര്‍ന്നാണ് തീരുമാനം പുനപ്പരിശോധിക്കാന്‍ സുപ്രീംകോടതി തീരുമാനിച്ചത്.സുപ്രീം കോടതിയില്‍ കൊളീജിയം സംവിധാനം നിലവില്‍ വന്നതിന് ശേഷം ഇതാദ്യമായാണ് ഇത്തരമൊരു നടപടി.

ഇനിയൊരു ഉത്തരവ് ഉണ്ടാകുന്നത് വരെ ചീഫ് ജസ്റ്റിസ് സിറ്റിങ്ങില്‍ പങ്കെടുക്കില്ലെന്ന് കര്‍ണാടക ഹൈക്കോടതി രജിസ്ട്രാര്‍ കഴിഞ്ഞദിവസം അറിയിച്ചിരു്‌നനു. അദ്ദേഹത്തിന്റെ കീഴിലുള്ള കേസുകള്‍ രണ്ടാം കോടതിമുറിയില്‍ ജസ്റ്റിസ് വി ഗോപാല ഗൗഡയുടെ നേതൃത്വത്തിലുള്ള ഡിവിഷന്‍ബെഞ്ചാണ് ഇനി പരിഗണിക്കുക. അതേ സമയം തനിക്കെതിരായ ആരോപണങ്ങള്‍ അടിസ്ഥാനരഹിതവും ദുരുദ്ദ്യേശപരവുമാണെന്ന് ജസ്റ്റിസ് ദിനകരന്‍ പ്രതികരിച്ചു.