പിഡിപി ബന്ധം: വിഎസിന് വീണ്ടും വിമര്‍ശനം

തിരുവനന്തപുരം: മുഖ്യമന്ത്രി വിഎസ് അച്യുതാനന്ദന് വീണ്ടും പാര്‍ട്ടിയുടെ ശകാരം.

കഴിഞ്ഞ പാര്‍ലമെന്റ് തിരഞ്ഞെടുപ്പില്‍ പിഡിപിയുടെ പിന്തുണ സിപിഎം സ്വീകരിച്ചത് സംബന്ധിച്ച് കഴിഞ്ഞ ദിവസം വിഎസ് നടത്തിയ പരാമര്‍ശങ്ങള്‍ക്കെതിരെയാണ് സെക്രട്ടേറിയറ്റില്‍ വിമര്‍ശനമുയര്‍ന്നത്.

തിരഞ്ഞെടുപ്പില്‍ പിഡിപി നല്‍കിയ പിന്തുണ സ്വീകരിച്ചതിനപ്പുറം മറ്റൊരു ബന്ധവും പാര്‍ട്ടിയ്ക്ക് പിഡിപിയുമായി ഉണ്ടായിരുന്നില്ലെന്ന് നേരത്തേ വ്യക്തമാക്കിയതാണ്. എന്നാല്‍ ഇതില്‍ക്കൂടുതല്‍ ബന്ധം പിഡിപിയുമായി ഉണ്ടായിരുന്നുവെന്ന് തോന്നിക്കുന്നതാണ് വിഎസ് പരാമര്‍ശനമെന്നാണ് വിമര്‍ശനം.

എന്നാല്‍ സെക്രട്ടേറിയറ്റില്‍ പങ്കെടുത്ത വിഎസ് ഈ നിലപാടിനോട് യോജിച്ചില്ല. പിഡിപിയുമായി ഉണ്ടാക്കിയ ബന്ധം സംബന്ധിച്ച് കേന്ദ്രകമ്മിറ്റി അംഗീകരിച്ച നിലപാടിന് അനുസൃതമാണ് താന്‍ സ്വീകരിച്ച നിലപാടെന്നായിരുന്നു മുഖ്യമന്ത്രിയുടെ വാദം.

പിഡിപി ബന്ധം സംബന്ധിച്ച് കേന്ദ്ര നേതൃത്വത്തിന്റെ നിലപാടിന് അനുസൃതമല്ല സംസ്ഥാന നേതൃത്വത്തിന്റെ നിലപാടെന്നു ചൂണ്ടിക്കാട്ടി വിഎസ് കേന്ദ്ര നേതൃത്വത്തെ സമീപിച്ചുവെന്ന് നേരത്തേ സൂചനയുണ്ടായിരുന്നു.

പിഡിപിയുമായി ഇപ്പോള്‍ ഒരു ബന്ധവും ഇല്ലെന്നും ഭാവിയില്‍ ഒന്നുമുണ്ടാകില്ലെന്നുമായിരുന്നു കഴിഞ്ഞ ദിവസത്തെ മന്ത്രിസഭാ യോഗം കഴിഞ്ഞ് നടത്തിയ വാര്‍ത്താസമ്മേളനത്തില്‍ വിഎസ് പറഞ്ഞത്.