മൂന്നാര്‍ ഏരിയാ സെക്രട്ടറിയെ സിപിഎം നീക്കി

ഇടുക്കി: സിപിഎം സംസ്ഥാന നേതൃത്വത്തിന് ഏറെ തലവേദന സൃഷ്ടിച്ച മൂന്നാര്‍ ഏരിയ സെക്രട്ടറി ശശികുമാറിനെ തല്‍സ്ഥാനത്ത് നിന്ന നീക്കി. ആരോഗ്യപരമായ കാരണങ്ങളിലാണ് ശശികുമാറിനെ ഒഴിവാക്കിയതെന്നാണ് പാര്‍ട്ടിയുടെ വിശദീകരണം. അതേ സമയം മൂന്നാര്‍ ഒഴിപ്പിയ്ക്കല്‍ കാലത്തെ ശശികുമാറിന്റെ ചെയ്തികളാണ് അദ്ദേഹത്തിന്റെ സ്ഥാനചലനത്തിനിടയാക്കിയതെന്ന് സൂചനകളുണ്ട്.

കഴിഞ്ഞ നവംബര്‍ 30ന് ശശികുമാറിന്റെ അസാന്നിധ്യത്തില്‍ ചേര്‍ന്ന ഏരിയ കമ്മിറ്റി യോഗം മുന്‍ എംഎല്‍എ സുന്ദരമാണിക്യത്തിന് സെക്രട്ടറിയുടെ താത്കാലിക ചുമതല നല്‍കുന്നതിന് തീരുമാനിച്ചിരുന്നു.

വിഎസ് സര്‍ക്കാരിന് ഏറെ പൊളിറ്റിക്കല്‍ മൈലേജ് നല്‍കിയ മൂന്നാര്‍ ഒഴിപ്പിയ്ക്കല്‍ നടപടിയ്‌ക്കെതിരെ ശക്തമായ നിലപാടെടുത്തത് ശശികുമാറായിരുന്നു.ജനരോഷം ദൗത്യസംഘത്തിനെതിരെ തിരിച്ചുവിടുന്നതില്‍ ശശികുമാര്‍ ചെറുതല്ലാത്ത പങ്ക് വഹിച്ചിട്ടുണ്ടെന്ന് പാര്‍ട്ടിയ്ക്കുള്ളില്‍ പല കോണുകളില്‍ നിന്നും കുറ്റപ്പെടുത്തലുകളുണ്ടായിരുന്നു. ഒഴിപ്പിയ്ക്കല്‍ നടപടികള്‍ അട്ടിമറിയ്ക്കുന്നതിന് റിസോര്‍ട്ട് ഉടമകളില്‍ന നിന്ന് ശശികുമാര്‍ പണം പറ്റിയതായും പാര്‍ട്ടിയ്ക്കുള്ളില്‍ ആരോപണം ഉയര്‍ന്നിരുന്നു.