മദനിയുടെ സഹായി കോടതിയില്‍ ഹാജരായി

കണ്ണൂര്‍: പിഡിപി ചെയര്‍മാന്‍ അബ്ദുള്‍ നാസര്‍ മദനിയുടെ സഹായി മണി എന്ന യൂസഫ് കോടതിയില്‍ ഹാജരായി.

പിഡിപി പ്രവര്‍ത്തകര്‍ക്കൊപ്പം മട്ടന്നൂര്‍ കോടതിയിലാണ് മണി ഹാജരായത്. ദീര്‍ഘകാലമായി മദനിയും മണിയും തമ്മില്‍ ബന്ധമുണ്ട്.

എന്നാല്‍ ഒരിക്കല്‍ ഒരു കേസില്‍ മണി മദനിക്കെതിരെ മൊഴി നല്‍കി മാപ്പു സാക്ഷിയായിരുന്നു. പിന്നീട് ലോക്‌സഭാ തിരഞ്ഞെടുപ്പ് കാലത്ത് മദനിക്കൊപ്പം യൂസഫ് വീണ്ടും തിരുവനന്തപുരത്ത് പ്രത്യക്ഷപ്പെട്ടു.

മാര്‍ച്ച് 28ന് കേസരി ഹാളില്‍ നടത്തിയ വാര്‍ത്താസമ്മേളനത്തില്‍ മദനിക്കൊപ്പം മണിയുമുണ്ടായിരുന്നു. ഉന്നതരുടെ നിര്‍ബ്ബന്ധം മൂലമാണ് താന്‍ മദനിക്കെതിരെ മൊഴി നല്‍കിയതെന്ന് അന്ന് മണി വ്യക്തമാക്കിയിരുന്നു.

കണ്ണൂര്‍ സ്വദേശിയായ മണി കോയമ്പത്തൂരില്‍ ഒരു കേസില്‍പ്പെട്ട് ജയിലിലായപ്പോഴാണ് അവിടെയുണ്ടായിരുന്ന മദനിയുമായി അടുത്തത്. പിന്നീട് മദനിയുടെ സഹായിയാവുകയും യൂസഫ് എന്ന് പേരുമാറ്റുകയും ചെയ്തു.

മണിയുടെ ഭാര്യ തന്റെ ഭര്‍ത്താവിനെ കാണാനില്ലെന്ന് കാണിച്ച് ഒക്ടോബര്‍ 23ന് മട്ടന്നൂര്‍ പൊലീസ് സ്റ്റേഷനില്‍ പാരതി നല്‍കിയിരുന്നു.

എന്നാല്‍ കഴിഞ്ഞയാഴ്ചയോടെ മണി കൊല്ലം ജില്ലയില്‍ മദനിയുടെ സ്വദേശമായ അന്‍വാര്‍ശേരിയില്‍ ഉണ്ടെന്ന് അഭ്യൂഹങ്ങള്‍ പരന്നിരുന്നു.

ഇതേത്തുടര്‍ന്ന് സ്‌പെഷ്യല്‍ ബ്രാഞ്ച് അന്വേഷണം നടത്തിയെങ്കിലും ഇയാളെ കണ്ടെത്താന്‍ കഴിഞ്ഞിരുന്നില്ല. ഈ സാഹചര്യത്തിലാണ് മണി കോടതിയില്‍ ഹാജരായത്.