ശബരിമലയിലെ കാനനപാതയില്‍ ക്യാമറകള്‍

ശബരിമല: സുരക്ഷ ശക്തമാക്കുന്നതിന്റെ ഭാഗമായി ശബരിമലയിലെ കാനനപാതയില്‍ 22 ക്ലോസഡ് സര്‍ക്യൂട്ട് ക്യാമറ സ്ഥാപിക്കുമെന്ന് ദേവസ്വം ബോര്‍ഡ് അറിയിച്ചു. കഴിഞ്ഞ ദിവസം മരക്കൂട്ടത്തും ചെലിക്കുഴിയിലും പൊട്ടിത്തെറിയുണ്ടായതിനെത്തുടര്‍ന്ന് സുരക്ഷ ശക്തമാക്കുന്നതിന്റെ ഭാഗമാണിത്. പൊട്ടിത്തറിയില്‍ ആര്‍ക്കും അപായമുണ്ടായില്ലെങ്കിലും സംഭവത്തെ അതീവഗൗരവമായാണ് സുരക്ഷ ഉദ്യോഗസ്ഥര്‍ കാണുന്നത്.

ഇത് സംബന്ധിച്ചുള്ള അന്വേഷണങ്ങള്‍ക്കായി പ്രത്യേക പൊലീസ് സംഘത്തെ നിയോഗിച്ചിട്ടുണ്ട്. ത്തനംതിട്ട നാര്‍ക്കോട്ടിക് ഡിവൈഎസ്.പി ടികെ. ജഗദീഷിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുകയെന്ന് ജില്ലാ പോലീസ് സൂപ്രണ്ട് പറഞ്ഞു.

അതിനിടെ സന്നിധാനത്ത് രണ്ട് ദിവസമായി തുടരുന്ന തിരക്കിന് ഇനിയും ശമനമായില്ല. ചൊവ്വാഴ്ച ഉച്ചയ്ക്ക് പതിനെട്ടാംപടിക്ക് താഴെ ഉണ്ടായ തിരക്കില്‍പ്പെട്ട് അന്‍പതോളം തീര്‍ത്ഥാടകര്‍ക്ക് പരിക്കേറ്റു. തിരക്കിനിടെ ഒട്ടേറെ പേര്‍ക്ക് ഇരുമുടിക്കെട്ടുകളും പഴ്‌സുകളും നഷ്ടമായി.

ഇതിനിടെ നൂറുകണക്കിന് ആളുകള്‍ കൂട്ടം തെറ്റി അലയേണ്ടി വരികയും ചെയ്തു. ദര്‍ശനത്തിന് പതിനഞ്ച് മുതല്‍ ഇരുപത് മണിക്കൂര്‍വരെയാണ് തീര്‍ത്ഥാടകര്‍ക്ക് കാത്തുനില്‍ക്കേണ്ടി വരുന്നത്. തിരക്ക് പ്രമാണിച്ച് പമ്പയില്‍ ഏര്‍പ്പെടുത്തിയ നിയന്ത്രണങ്ങള്‍ ഇപ്പോഴും തുടരുകയാണ്.