ആന്ധ്രയുടെ ചുമതല ഇഎസ്എല്‍ നരസിംഹന്

ദില്ലി : ആന്ധ്രപ്രദേശിന്റെ ചുമതല ഛത്തിസ്ഗഢ് ഗവര്‍ണര്‍ ഇ.എസ്.എല്‍. നരസിംഹന് നല്‍കി.

ലൈംഗികാപവാദത്തെത്തുടര്‍ന്ന് ആന്ധ്ര ഗവര്‍ണറായിരുന്ന എന്‍.ഡി.തിവാരി രാജിവച്ച സാഹചര്യത്തിലാണ് ഛത്തിസ്ഗഢ് ഗവര്‍ണര്‍ക്ക് അധികചുമതല നല്‍കിയത്.

തിവാരിയുള്‍പ്പെടുന്ന കിടപ്പറ ദൃശ്യങ്ങള്‍ ആന്ധ്രയിലെ ഒരു പ്രാദേശിക ചാനല്‍ പുറത്തു വിട്ടതിനെത്തുടര്‍ന്ന് ശനിയാഴ്ചയാണ് തിവാരി രാജിക്കത്ത് നല്‍കിയത്. ആരോഗ്യപരമായ കാരണങ്ങളാല്‍ സ്ഥാനമൊഴിയുന്നുവെന്നാണ് രാജിക്കത്തില്‍ പറയുന്നത്.

ഇതിനിടെ തിങ്കളാഴ്ച ആരംഭിക്കാനിരുന്ന ഹൈദരബാദ് സന്ദര്‍ശനം രാഷ്ട്രപതി പ്രതിഭാപാട്ടീല്‍ മാറ്റിവച്ചതായി റിപ്പോര്‍ട്ടുണ്ട്. ആന്ധ്രയിലെ പ്രത്യേക സാഹചര്യം കണക്കിലെടുത്താണ് തീരുമാനമെന്നറിയുന്നു.

എന്നാല്‍ ജാര്‍ഖണ്ഡിലെ സര്‍ക്കാര്‍ രൂപവത്ക്കരണവുമായി ബന്ധപ്പെട്ടാണ് രാഷ്ട്രപതി സന്ദര്‍ശനം മാറ്റിയതെന്നാണ് രാഷ്ട്രപതി ഭവന്റെ വിശദീകരണം.

കൊച്ചി സന്ദര്‍ശനം കഴിഞ്ഞ് ഹൈദരബാദിനു മടങ്ങാനായിരുന്നു രാഷ്ട്രപതി നേരത്തെ നിശ്ചയിച്ചിരുന്നത്.