വാദി പ്രതിയാവുന്ന ഇക്കാലതത് പരാതിയില്ല

തിരുവനന്തപുരം: തന്നെ കയ്യേറ്റം ചെയ്യാന്‍ ശ്രമിച്ചവര്‍ക്കെതിരെ പരാതി നല്‍കാന്‍ ഉദ്ദേശിക്കുന്നില്ലെന്ന് എഴുത്തുകാരന്‍ സക്കറിയ.

അങ്ങനെ ചെയ്താല്‍ വാദി പ്രതിയാകുന്ന അവസ്ഥയാണ് കേരളത്തിലേത്. ഭരണപക്ഷത്തിരിക്കുന്നവരാണ് ആക്രമിച്ചത്. പോലീസും അവരുടെ കയ്യിലാണ്. അതുകൊണ്ട് മിണ്ടാതിരിക്കുന്നതാണ് ബുദ്ധി.

കാസര്‍ക്കോട് മുന്‍ എം.പി ടി.ഗോവിന്ദന്റെ മകന്‍ ഉള്‍പ്പെടെയുള്ളവരാണ് ആക്രമണത്തിന് പിന്നില്‍. കോടിയേരിയുടെ നാട്ടില്‍ വെച്ചാണ് സംഭവം നടന്നത്- സക്കറിയ പറഞ്ഞു.

സ്വതന്ത്രമായ ചിന്തകള്‍ ഉള്‍ക്കൊള്ളേണ്ട സംഘടനയാണ് ഡിവൈഎഫ്ഐ എന്നാല്‍ കാലങ്ങളായി അവരില്‍ ഉണ്ടായ അപചയത്തിന്റെ തെളിവാണിത്. മുമ്പൊന്നും ഡിവൈഎഫ്ഐ ഇങ്ങനെയായിരുന്നില്ല.

ഇവരാണ് ഭാവി സിപിഎമ്മിന്റെ നേതൃനിരയിലേക്കു പോകേണ്ടവര്‍. ഫാസിസവും അഹന്തയും അധികാരത്തിന്റെ ധാര്‍ഷ്ട്യവുമാണ് ആക്രമിച്ചവരുടെ മുഖത്തുണ്ടായിരുന്നത്.

മഞ്ചേരിയില്‍ രാജ്‌മോഹന്‍ ഉണ്ണിത്താന്‍ താമസിച്ച വീട്ടില്‍ വാതില്‍ ചവിട്ടിത്തുറന്ന് അകത്ത് കയറി സ്ത്രീയെ അധിക്ഷേപിച്ചവര്‍ക്ക് കുറ്റമില്ല. അറസ്റ്റ് ചെയ്യപ്പെട്ടത് ഉണ്ണിത്താനാണ്. അതാണ് ഇന്നത്തെ അവസ്ഥ. പരാതി കൊടുത്താല്‍ ചിലപ്പോള്‍ ഞാന്‍ അകത്തു പോകേണ്ടിവരും- അദ്ദേഹം പറഞ്ഞു.