ഗൗഡ മാപ്പു പറയണമെന്ന് ബിജെപി

ബാംഗ്ലൂര്‍: കര്‍ണാടക മുഖ്യമന്ത്രി ബിഎസ് യെദ്യൂരപ്പയെ അസഭ്യം പറഞ്ഞ ജനതാദള്‍ നേതാവ് ദേവ ഗൗഡയ്‌ക്കെതിരെ നിയമനടപടി സ്വീകരിക്കുമെന്ന് ബിജെപി.

എന്നാല്‍ ഇക്കാര്യത്തില്‍ ഗൗഡയ്‌ക്കെതിരെ നിയമനടപടികളൊന്നും സ്വീകരിക്കേണ്ടതില്ലെന്നാണത്രേ യെദ്യൂരപ്പയുടെ നിലപാട്.

ഗൗഡയ്ക്കുള്ള ശിക്ഷ കര്‍ണാടകത്തിലെ ജനങ്ങള്‍ നല്‍കുമെന്നുമാണത്രേ ഇതുസംബന്ധിച്ച് നടത്തിയ ചര്‍ച്ചയില്‍ യെദ്യൂരപ്പ പറഞ്ഞത്.

പരാമര്‍ശത്തില്‍ ഗൗഡ പരസ്യമായി മാപ്പു പറയണമെന്നും അല്ലെങ്കില്‍ അദ്ദേഹത്തെ കോടതി കയറ്റുമെന്നുമാണ് ബിജെപി പറയുന്നത്.

ഗൗഡയുടെ പരാമര്‍ശങ്ങളോട് ഞങ്ങള്‍ കടുത്ത പ്രതിഷേധം രേഖപ്പെടുത്തുന്നു. എത്രയും പെട്ടന്ന് കര്‍ണാടകത്തിലെ ജനങ്ങളോട് അദ്ദേഹം മാപ്പപേക്ഷ നടത്തണം, അല്ലെങ്കില്‍ അദ്ദേഹത്തിനെതിരെ നിയമനടപടി സ്വീകരിക്കും- ബിജെപി നേതാവ് ധനഞ്ജയ് കുമാര്‍ പറഞ്ഞു.

യദ്യൂരപ്പയെ അസഭ്യം പറഞ്ഞതിനൊപ്പം തന്നെ സംസ്ഥാനത്തെ ബിജെപി നേതൃത്വത്തെയും ഗൗഡ വിമര്‍ശിച്ചിരുന്നു. സംഭവത്തില്‍ ബിജെപി കേന്ദ്ര നേതൃത്വവും പ്രതികരിച്ചിട്ടുണ്ട്.

ഗൗഡയുടെ വാക്കുകളില്‍ നിന്നും മനസ്സിലാകുന്നത്, അദ്ദേഹം അങ്ങേയറ്റം മാനസികമായ അസ്വസ്ഥത അനുഭവിക്കുന്നുണ്ടെന്നാണ്. എത്രയും പെട്ടന്ന് അദ്ദേഹം സുഖപ്പെടട്ടേയെന്ന് ഒരു സന്ദേശം അയക്കാന്‍ മാത്രമേ എനിക്ക് കഴിയൂ എന്നാണ് ബിജെപി ദേശീയ വക്താവ് പ്രകാശ് ജാവദേകര്‍ പ്രതികരിച്ചത്.

ജനങ്ങള്‍ തിരഞ്ഞെടുത്ത മുഖ്യമന്ത്രിയാണ് യെദ്യൂരപ്പ അദ്ദേഹം വഹിക്കുന്നത് ഭരണഘടനാപരമായ പദവിയാണ്. അദ്ദേഹത്തെ ചീത്തവിളിച്ച ഗൗഡ ജനാധിപത്യത്തിന് അപമാനമാണ്- മറ്റൊരു പാര്‍ട്ടി വക്താവ് രവി ശങ്കര്‍ പ്രസാദ് പറഞ്ഞു.