രുചിക കേസ് സിബിഐക്ക്

ദില്ലി: രുചിക ഗിര്‍ഹോത്രയുടെ ആത്മഹത്യയുമായി ബന്ധപ്പെട്ട കേസുകള്‍ സിബിഐയ്ക്ക് കൈമാറാന്‍ തീരുമാനമായി. ഹരിയാന സര്‍ക്കാരാണ് കേസ് സിബിഐയ്ക്ക് വിടാന്‍ തീരുമാനിച്ചത്. ആത്മഹത്യാ പ്രേരണ ഉള്‍പ്പെടെയുള്ള കേസുകളാവും സിബിഐ അന്വേഷിയ്ക്കുക.

ടെന്നീസ് താരമായിരുന്ന രുചികയെ 19 വര്‍ഷം മുമ്പാണ് ഹരിയാന മുന്‍ ഡിജിപിയായിരുന്ന എസ്പിഎസ് റാത്തോഡ് മാനഭംഗപ്പെടുത്തിയത്. തുടര്‍ന്ന് രുചികയുടെ വീട്ടുകാര്‍ റാത്തോഡിനെതിരെ കേസ് കൊടുത്തപ്പോള്‍ കുടുംബത്തെ വേട്ടയാടുന്ന തരത്തിലുള്ള ശ്രമങ്ങളാണ് പൊലീസിന്റെ ഭാഗത്തു നിന്നുണ്ടായത്.

സഹോദരനെ കള്ളക്കേസില്‍ കുടുക്കുകയും രുചികയെ കാരണമില്ലാതെ സ്‌കൂളില്‍ നിന്ന് പുറത്താക്കുകയും ചെയ്തു. ഇതോടെ മാനസികമായി തകര്‍ന്ന രുചിക മൂന്ന് വര്‍ഷത്തിന് ശേഷം കുടുംബാംഗങ്ങള്‍ക്ക് ഉണ്ടായ പ്രയാസങ്ങളില്‍ മനംനൊന്ത് ജീവനൊടുക്കുകയായിരുന്നു.

രണ്ട് പതിറ്റാണ്ട നീണ്ട നിയമയുദ്ധത്തിനൊടുവില്‍ കഴിഞ്ഞ മാസം കോടതി കുറ്റക്കാരനെന്ന് കണ്ടെത്തിയ റാത്തോഡിന് ആറ് മാസത്തെ തടവ് ശിക്ഷ മാത്രമാണ് ലഭിച്ചത്. ഇത് വിവാദമായ പശ്ചാത്തലത്തിലാണ് രുചികയുമായി ബന്ധപ്പെട്ട എല്ലാ കേസുകളും ഹരിയാന പോലീസില്‍ നിന്ന് എടുത്തുമാറ്റി സിബിഐക്ക് കൈമാറിയത്.