ദേവ ഗൗഡ യെദ്യൂരപ്പയോട് ക്ഷമ പറഞ്ഞു

ബാംഗ്ലൂര്‍: യെദ്യൂരപ്പയെ അസഭ്യം പറഞ്ഞ്‌ വിവാദമായതോടെ മുന്‍ പ്രധാനമന്ത്രിയും ജനതാദള്‍ ഗൗഡാ വിഭാഗം ദേശീയ പ്രസിഡന്റുമായ ദേവഗൗഡ ക്ഷമ പറഞ്ഞു.

'യെദ്യൂരപ്പയെ എന്റെ വാക്കുകള്‍ വേദനിപ്പിച്ചതില്‍ ക്ഷമചോദിക്കുന്നു'വെന്ന് ഒരു സ്വകാര്യ ടെലിവിഷന്‍ ചാനലിനു നല്‌കിയ ടെലിഫോണ്‍ അഭിമുഖത്തിനിടെയാണ് ഗൗഡ പറഞ്ഞത്.

എക്‌സ്‌പ്രസ്സ്‌ ഹൈവേ വിരുദ്ധ പ്രക്ഷോഭത്തില്‍ കര്‍ഷകരുടെ നേതാവ് അസഭ്യപദം ഉപയോഗിച്ചത്‌ തെറ്റായിപ്പോയെന്ന്‌ പറഞ്ഞതോടെയാണ്‌ ക്ഷമചോദിക്കാന്‍ ഗൗഡ നിര്‍ബന്ധിതനായത്‌.

ഒരു മുന്‍ പ്രധാനമന്ത്രിക്ക്‌ നിരക്കാത്ത ഭാഷയാണ്‌ ദേവഗൗഡ ഉപയോഗിച്ചതെന്ന്‌ ഹെസിഗപുരയില്‍ പ്രക്ഷോഭം നടത്തുന്ന കര്‍ഷകരുടെ നേതാവ്‌ കൊഡഹള്ളി ചന്ദ്രശേഖര്‍ പറഞ്ഞു.

തൊട്ടുപിന്നാലെയാണ്‌ ക്ഷമ പറഞ്ഞുകൊണ്ടുള്ള ഗൗഡയുടെ പ്രതികരണം വന്നത്‌. പരാമര്‍ശം പിന്‍വലിച്ച്‌ മാപ്പുപറഞ്ഞില്ലെങ്കില്‍ നിയമനടപടി സ്വീകരിക്കുമെന്ന്‌ ബിജെപി സംസ്ഥാന പ്രസിഡന്റ്‌ സദാനന്ദഗൗഡയും മുന്നറിയിപ്പ്‌ നല്‌കിയിരുന്നു.

യെദ്യൂരപ്പ കഴിവുകെട്ടവനും തന്തയില്ലാത്തവനുമാണെന്ന് പറഞ്ഞ ഗൗഡ ഒട്ടേറെ ആരോപണങ്ങള്‍ മുഖ്യമന്ത്രിക്കെതിരെ ഉന്നയിച്ചിരുന്നു.