ഇന്ത്യന്‍ യുവതിയുടെ മരണം കൊലപാതകം?

മെല്‍ബണ്‍: ആസ്‌ത്രേലിയയില്‍ ബ്രിസ്‌ബേനിലെ കനാലില്‍ അവശനിലയില്‍ കണ്ടെത്തിയ ഇന്ത്യന്‍ യുവതി മരിച്ചു. പഞ്ചാബ് സ്വദേശിനിയായ അമന്‍ദീപ് കൗര്‍ (21) മരിച്ചത്. കഴിഞ്ഞ മാസം 21നാണ് ഇവരെ വീട്ടില്‍ നിന്നും ഏതാനും മൈല്‍ അകലെയുള്ള കനാലില്‍ ദുരൂഹസാഹചര്യത്തില്‍ കണ്ടെത്തിയത്. വെന്റിലേറ്ററിന്റെ സഹായത്തോടെ ജീവന്‍ രക്ഷിയ്ക്കാന്‍ ശ്രമിച്ചെങ്കിലും പരാജയപ്പെടുകയായിരുന്നു.

അമന്‍ദീപിന്റെ മരണം കൊലപാതകമാണെന്ന് ബന്ധുക്കള്‍ ആരോപിച്ചു. അമന്റെ നെറ്റിയില്‍ കണ്ട വലിയ മുറിവ് ഇതിന് തെളിവാണെന്നും അവര്‍ പറയുന്നു. കേസന്വേഷണം കാര്യക്ഷമമല്ലെന്നും ബന്ധുക്കള്‍ കുറ്റപ്പെടുത്തിയിട്ടുണ്ട്.

സംഭവവുമായി ബന്ധപ്പെട്ട് അമന്‍ദീപിന്റെ ഭര്‍ത്താവ് റാണ പരദീപിനെ പൊലീസ് കസ്റ്റഡിയിലെടുത്ത് ചോദ്യം ചെയ്തതിന് ശേഷം വിട്ടയച്ചിരുന്നു. അമന്‍ ആത്മഹത്യ ചെയ്തതാകാമെന്നാണ് റാണ പൊലീസിന് നല്‍കിയ മൊഴി.

കഴിഞ്ഞയാഴ്ച ഇന്ത്യന്‍ വംശജരായ രണ്ടു പേര്‍ ഓസ്‌ട്രേലിയയില്‍ വംശീയാക്രമണത്തിനു വിധേയരായി കൊല്ലപ്പെട്ടതിനെ തുടര്‍ന്ന് ഇരു രാജ്യങ്ങളിലും തമ്മിലുള്ള നയതന്ത്രബന്ധം വഷളായിരുന്നു. ഈ സാഹചര്യത്തിലാണ് ഇന്ത്യന്‍ യുവതി ദൂരൂഹ സാഹചര്യത്തില്‍ മരിച്ച വാര്‍ത്ത പുറത്തു വന്നിരിക്കുന്നത്.