പോള്‍ വധം: കേസ് ഡയറി ഹാജരാക്കാന്‍ നിര്‍ദ്ദേശം

കൊച്ചി: പോള്‍ മുത്തൂറ്റ് വധക്കേസില്‍ കേസ് ഡയറി ഹാജരാക്കാന്‍ ഹൈക്കോടതി നിര്‍ദേശം.

കൊലപാതകത്തെത്തുടര്‍ന്ന് നെടുമുടി പൊലീസ് തയ്യാറാക്കിയ കേസ് ഡയറി ഹാജരാക്കാനാണ് കോടതി നിര്‍ദ്ദേശിച്ചിരിക്കുന്നത്.

കുറ്റപത്രത്തിലെ തെളിവുകള്‍ വിശദമായി ചര്‍ച്ച ചെയ്യരുതെന്നു പ്രോസിക്യൂഷന്‍ കോടതിയില്‍ അഭ്യര്‍ത്ഥിച്ചു. തെളിവുകള്‍ വിശദമായി ചര്‍ച്ച ചെയ്യുന്നത് പ്രതികളെ സഹായിക്കുമെന്നും പ്രോസിക്യൂഷന്‍ വാദിച്ചു.

എന്നാല്‍ തെളിവുകള്‍ ചര്‍ച്ച ചെയ്യില്ലെന്ന് വ്യക്തമാക്കിയ കോടതി രേഖകള്‍ പരിശോധിക്കാന്‍ അധികാരമുണ്ടെന്ന് ചൂണ്ടിക്കാട്ടി.

ചീഫ് ജസ്റ്റിസ് എസ് ആര്‍ ബന്നൂര്‍മഠും ജസ്റ്റിസ് തോട്ടത്തില്‍ ബി രാധാകൃഷ്ണും അടങ്ങുന്ന ഡിവിഷന്‍ ബഞ്ച് സിബിഐ അന്വേഷണം ആലഷ്യപ്പെട്ട് സമര്‍പ്പിച്ച ഹര്‍ജിയില്‍ വാദം കേള്‍ക്കുന്നത് തുടരുകയാണ്

അതിനിടെ കേസില്‍ പിടികിട്ടാനുണ്ടായിരുന്ന പ്രതികളിലൊരാളെ പൊലീസ് കസ്റ്റഡിയിലെടുത്തു. പന്ത്രണ്ടാം പ്രതി സോണി എന്നു വിളിക്കുന്ന രമേശിനെയാണ് പൊലീസ് കസ്റ്റഡിയിലെടുത്തത്.

ചങ്ങനാശേരി ക്വട്ടേഷന്‍ സംഘത്തിലെ അംഗമായിരുന്നു സോണി. പോള്‍ കൊല്ലപ്പെട്ട സ്ഥലത്തെത്തിച്ച് തെളിവെടുത്ത ഇയാളെ രാമങ്കരി ഒന്നാം ക്ളാസ് ജുഡീഷ്യല്‍ മജിസ്ട്രേറ്റ് കോടതിയില്‍ ഹാജരാക്കും.