ആസ്ത്രേലിയന്‍ ടീമിനെ കളിക്കാനനുവദക്കില്ല: താക്കറെ

മുംബൈ: ആസ്ത്രേലിയന്‍ ക്രിക്കറ്റ് ടീമിനെ മഹാരാഷ്ട്രയില്‍ കളിക്കാന്‍ അനുവദിക്കില്ലെന്ന് ശിവസേന തലവന്‍ ബാല്‍ താക്കറെ.

ശിവസേന മുഖപത്രമായ സാംനയിലെഴുതിയ ലേഖനത്തിലാണ് താക്കറെ ഈ നിലപാട് പ്രഖ്യാപിച്ചിരിക്കുന്നത്.

ഇന്ത്യക്കാര്‍ക്കെതിരെ ആസ്ത്രേലിയയില്‍ ആക്രമണം തുടരുന്നതില്‍ പ്രതിഷേധിച്ചാണ് ഓസീസ് ടീമിനെ മഹാരാഷ്ട്രയില്‍ എവിടെയും കളിക്കാന്‍ അനുവദിക്കില്ലെന്ന് താക്കറെ പറഞ്ഞത്.

പാകിസ്താന്‍ താരങ്ങളെ മഹാരാഷ്ട്രയില്‍ കളിപ്പിക്കില്ലെന്ന നിലപാട് നേരത്തെ തന്നെ ശിവസേന കൈക്കൊണ്ടിരുന്നു. അത് ഇപ്പോഴും തുടരുന്നുണ്ടെന്നും അദ്ദേഹം പറഞ്ഞു.

ഇന്ത്യന്‍ ക്രിക്കറ്റ് താരങ്ങള്‍ക്കെതിരെയും രൂക്ഷമായ വിമര്‍ശനമാണ് താക്കറെ നടത്തിയത്. നമ്മുടെ യുവാക്കള്‍ ആസ്ത്രേലിയിയില്‍ കുത്തേറ്റം പൊള്ളലേറ്റും മരിയ്ക്കുകയാണ്. എന്നിട്ടും അവിടത്തെ ടീമിനൊപ്പം കളിക്കാന്‍ ഇന്ത്യന്‍ താരങ്ങള്‍ തയ്യാറാവുന്നു. അവര്‍ക്ക് ആത്മാഭിമാനമോ ദേശസ്‌നേഹമോ ഇല്ല- അദ്ദേഹം പറഞ്ഞു.

ക്വീന്‍സ് ലാന്‍ഡ് യൂണിവേഴ്‌സിറ്റി നല്‍കിയ അവാര്‍ഡ് നിരസിച്ച അമിതാഭ് ബച്ചനെ താക്കറെ അഭിനന്ദിച്ചു. അവാര്‍ഡ് നിരസിച്ചതിലൂടെ ബച്ചന്‍ തന്റെ ദേശസ്നേഹം വ്യക്തമാക്കിയെന്നും താക്കറെ പറഞ്ഞു.